Ўзбекистон ҳуқуқни муҳофаза қилувчи органлар қўл жанги федерацияси спортчилари ва мураббийлари Жаҳон чемпионатида муваффақиятли иштирок этганлиги учун муносиб тақдирланди.
Жорий йилнинг 16-18 июнь кунлари Қозоғистон Республикаси пойтахти Остона шаҳрида бўлиб ўтган қўл жанги спорти бўйича Жаҳон чемпионатида умумжамоа ҳисобида Ўзбекистон терма жамоаси фахрли 3-ўринни эгаллади. Шу муносабат билан Миллий гвардия Маънавият ва маърифат марказида қўл жанги бўйича жаҳон чемпионатида 7 та олтин, 6 та кумуш ва 12 та бронза медалини қўлга киритган терма жамоамиз мураббийлари ва аъзоларини тақдирлаш маросими бўлиб ўтди.
Ўзбекистон ҳуқуқни муҳофаза қилувчи органлар қўл жанги федерацияси раиси, Миллий гвардия қўмондони генерал-майор Р.Джураев спортчиларни нуфузли халқаро мусобақаларда муваффақиятли иштирок этиб, фахрли учинчи ўринни эгаллагани билан табриклади. Шунингдек, мазкур мусобақагача қўл жанги усталари бўлган спортчиларимиз халқаро мусобақаларда уч марта ғолибликни қўлга киритиб, шоҳсупанинг энг юқори поғонасига кўтарилганлигини таъкидлади. Жумладан, 2021-йилда Тошкент шаҳрида ўтказилган жаҳон чемпионатида Ўзбекистон терма жамоаси 8 та олтин, 11 та кумуш ва 8 та бронза медалини қўлга киритган бўлса, 2022-йилда Бухоро шаҳрида бўлиб ўтган ёшлар ва ўсмирлар ўртасидаги жаҳон чемпионатида юқори натижаларни қўлга киритишди. Якунда Қозон шаҳрида ташкил этилган катталар ўртасидаги Осиё чемпионатида қўл жангчиларимиз 8 та олтин, 7 та кумуш, 9 та бронза медалларига сазовор бўлишди.
Бугунги кунда республикамизда 781 та секцияда 30 мингдан ортиқ ёшлар мунтазам қўл жанги спорти бўйича машғулотларда иштирок этиб келишмоқда.
Федерация раиси мураббийларга профессионал спортчиларни тарбиялаётгани учун миннатдорлик билдириб, спортчиларнинг ўзларига эса машаққатли меҳнати ва ғалабага бўлган иродаси учун, шунингдек уларга бундан буён ҳам хизмат ва спортда ҳамда кузда Беларус Республикасида бўлиб ўтадиган қўл жанги спорти бўйича Жаҳон кубоги мусобақасида ғалаба қозонишини тилади. Шу билан бирга навбатдаги жаҳон чемпионатида турли намунадаги медалларни қўлга киритган ўн икки нафар қўл жанги спортчиларига, “Халқаро тоифадаги спорт ҳаками” малака тоифаси билан тақдирланган икки нафар ҳакамга “Фидойи ходими”, “Аъло хизматлари учун”, “Намунали хизматлари учун” кўкрак нишонларини ҳамда қўл соатлари ва фахрий ёрлиқларни топширди.
