Oʻzbekiston Respublikasi Milliy gvardiyasi Maʼnaviyat va maʼrifat markazida Mustaqilligimizning 34 yilligi munosabati bilan “Vatan uchun, Millat uchun, Xalq uchun!” shiori ostida bayram konsert dasturi tashkil etildi.
Unda olima, falsafa fanlari doktori, professor J.Shermuhamedova, Yozuvchilar uyushmasi, Respublika Maʼnaviyat va maʼrifat markazi vakillari, tizim faxriylari, gvardiyachilarning oila aʼzolari hamda “Mehribonlik uyi” tarbiyalanuvchilari ishtirok etishdi.
Tadbir avvalida Mustaqillik bayrami munosabati bilan xizmat vazifalarini sidqidildan bajarayotgan, fidoiylik va masʼuliyatli mehnati bilan alohida namuna koʻrsatayotgan gvardiyachilar, tizim faxriylari va samarali hamkorlik qilib kelayotgan tashkilotlar vakillari Milliy gvardiya qoʻmondonining tegishli buyrugʻi asosida idoraviy koʻkrak nishonlari, faxriy yorliqlar va esdalik sovgʻalari bilan taqdirlandi.
Shundan soʻng, Milliy gvardiya Ashula va raqs ansambli ijrosida Vatanni madh etuvchi kuy-qoʻshiqlar va “Toshkent zebolari” raqs jamoasining jonli chiqishlari ishtirokchilarga bayramona kayfiyat ulashdi.
Bunday tadbirlar yurtimiz tinchligi va xavfsizligini taʼminlayotgan gvardiyachilar hamda ularning oilalari uchun bayram kunlarida munosib hordiq va ruhiy yangilanish manbai boʻlib xizmat qiladi.
