Ўзбекистон Республикаси Миллий гвардияси Маънавият ва маърифат марказида Мустақиллигимизнинг 34 йиллиги муносабати билан “Ватан учун, Миллат учун, Халқ учун!” шиори остида байрам концерт дастури ташкил этилди.
Унда олима, фалсафа фанлари доктори, профессор Ж.Шермуҳамедова, Ёзувчилар уюшмаси, Республика Маънавият ва маърифат маркази вакиллари, тизим фахрийлари, гвардиячиларнинг оила аъзолари ҳамда “Меҳрибонлик уйи” тарбияланувчилари иштирок этишди.
Тадбир аввалида Мустақиллик байрами муносабати билан хизмат вазифаларини сидқидилдан бажараётган, фидоийлик ва масъулиятли меҳнати билан алоҳида намуна кўрсатаётган гвардиячилар, тизим фахрийлари ва самарали ҳамкорлик қилиб келаётган ташкилотлар вакиллари Миллий гвардия қўмондонининг тегишли буйруғи асосида идоравий кўкрак нишонлари, фахрий ёрлиқлар ва эсдалик совғалари билан тақдирланди.
Шундан сўнг, Миллий гвардия Ашула ва рақс ансамбли ижросида Ватанни мадҳ этувчи куй-қўшиқлар ва “Тошкент зеболари” рақс жамоасининг жонли чиқишлари иштирокчиларга байрамона кайфият улашди.
Бундай тадбирлар юртимиз тинчлиги ва хавфсизлигини таъминлаётган гвардиячилар ҳамда уларнинг оилалари учун байрам кунларида муносиб ҳордиқ ва руҳий янгиланиш манбаи бўлиб хизмат қилади.
