Qoraqalpog‘iston Respublikasi bo‘yicha Milliy gvardiya boshqarmasi va Sport vazirligi hamkorligida Nukus shahrida harbiy xizmatchilar o‘rtasida “Milliy gvardiya birinchiligi” o‘tkazildi. Musobaqa yunon-rum kurashi, erkin kurash va ayollar kurashi yo‘nalishlari bo‘yicha tashkil etilib, unda mamlakatimizning turli viloyatlaridan 100 dan ortiq sportchilar ishtirok etdi.
Musobaqaning ochilish marosimida so‘zga chiqqan mas’ullar, yurtimizda sport sohasiga davlatimiz rahbari tomonidan berilayotgan e’tibor va yosh avlod uchun yaratilayotgan qulay imkoniyatlar haqida so‘z yuritib, ishtirokchilarga omad tilashdi.
Ushbu sport tadbiri davomida sportchilar 7 ta vazn toifasida o‘zaro kuch sinashdi. Har bir yo‘nalishda bellashuvlar qizg‘in va murosasiz kechdi. Ayniqsa, Qoraqalpog‘iston sportchilari o‘zining yuqori malakasi bilan ajralib turdi. Surxondaryo va Xorazm viloyatlaridan kelgan sportchilar ham katta mahorat namoyish
Natijalariga ko‘ra, umumjamoa hisobida 1-o‘rinni Milliy gvardiya Qoraqalpog‘iston Respublikasi bo‘yicha boshqarmasi, 2-o‘rinni Milliy gvardiya Surxondaryo viloyati bo‘yicha boshqarmasi va 3-o‘rinni Milliy gvardiya Xorazm viloyati bo‘yicha boshqarmasi qo‘lga kiritdi.
Yakunda g‘olib va sovrindorlar tashkilotchilar tomonidan diplom, medal va esdalik sovg‘alari bilan taqdirlandi. Tantanali marosimda barcha qatnashchilar va mehmonlar sportning yoshlar o‘rtasida ommalashuvi va rivojlanishi uchun tashkil etilgan bunday tadbirlarning ahamiyati haqida o‘z fikrlarini bildirdilar.
Shuni alohida ta’kidlash joizki, bu kabi musobaqalar nafaqat harbiy sportchilar o‘rtasida jismoniy chidamlilik va mahoratni oshirishga xizmat qilmoqda, balki yoshlarni sog‘lom turmush tarziga jalb qilish, vatanparvarlik va intizom ruhida tarbiyalashda ham muhim ahamiyat kasb etmoqda. Kelgusida bunday musobaqalar yanada kengroq doirada, ko‘proq ishtirokchilar bilan o‘tkazilishi rejalashtirilmoqda.