Қорақалпоғистон Республикаси бўйича Миллий гвардия бошқармаси ва Спорт вазирлиги ҳамкорлигида Нукус шаҳрида ҳарбий хизматчилар ўртасида “Миллий гвардия биринчилиги” ўтказилди. Мусобақа юнон-рум кураши, эркин кураш ва аёллар кураши йўналишлари бўйича ташкил этилиб, унда мамлакатимизнинг турли вилоятларидан 100 дан ортиқ спортчилар иштирок этди.
Мусобақанинг очилиш маросимида сўзга чиққан масъуллар, юртимизда спорт соҳасига давлатимиз раҳбари томонидан берилаётган эътибор ва ёш авлод учун яратилаётган қулай имкониятлар ҳақида сўз юритиб, иштирокчиларга омад тилашди.
Ушбу спорт тадбири давомида спортчилар 7 та вазн тоифасида ўзаро куч синашди. Ҳар бир йўналишда беллашувлар қизғин ва муросасиз кечди. Айниқса, Қорақалпоғистон спортчилари ўзининг юқори малакаси билан ажралиб турди. Сурхондарё ва Хоразм вилоятларидан келган спортчилар ҳам катта маҳорат намойиш
Натижаларига кўра, умумжамоа ҳисобида 1-ўринни Миллий гвардия Қорақалпоғистон Республикаси бўйича бошқармаси, 2-ўринни Миллий гвардия Сурхондарё вилояти бўйича бошқармаси ва 3-ўринни Миллий гвардия Хоразм вилояти бўйича бошқармаси қўлга киритди.
Якунда ғолиб ва совриндорлар ташкилотчилар томонидан диплом, медал ва эсдалик совғалари билан тақдирланди. Тантанали маросимда барча қатнашчилар ва меҳмонлар спортнинг ёшлар ўртасида оммалашуви ва ривожланиши учун ташкил этилган бундай тадбирларнинг аҳамияти ҳақида ўз фикрларини билдирдилар.
Шуни алоҳида таъкидлаш жоизки, бу каби мусобақалар нафақат ҳарбий спортчилар ўртасида жисмоний чидамлилик ва маҳоратни оширишга хизмат қилмоқда, балки ёшларни соғлом турмуш тарзига жалб қилиш, ватанпарварлик ва интизом руҳида тарбиялашда ҳам муҳим аҳамият касб этмоқда. Келгусида бундай мусобақалар янада кенгроқ доирада, кўпроқ иштирокчилар билан ўтказилиши режалаштирилмоқда.