Yoshlar oyligi doirasida joylarda turli madaniy-maʼrifiy, ko‘ngilochar tadbirlar, sport musobaqalari hamda uchrashuvlar o‘tkazilishi rejalashtirilgan.

Harbiy-vatanparvarlik festivalida viloyat hokimlari, O‘zbekiston yoshlar ishlari agentligi direktori va vakillari hamda masʼul rahbarlar ishtirok etib, mamlakatimizda yoshlar uchun yaratilayotgan imkoniyatlar haqida so‘z yuritildi. Iqtidor egalariga o‘z maqsadlariga erishish yo‘lida muhim o‘rin tutadigan kerakli tavsiyalar bilan o‘ziga xos motivatsiya berildi.

Shuningdek, tadbir doirasida harbiy xizmatchilar tomonidan harbiy texnikalar bilan ko‘cha bo‘ylab marsh yurishlari namoyish etildi. Festival shukuhi sportsevarlarni ham chetlab o‘tmadi. Chavandozlik mahorat darslari, sportning kamondan otish turi bo‘yicha tashkillashtirilgan musobaqalar barcha yoshlarda katta qiziqish uyg‘otib, faol o‘g‘il-qizlar o‘z imkoniyatlarini sinovdan o‘tkazishdi.Harbiy xizmatchilarning xizmat itlari bilan ko‘rsatgan chiqishlari barchaning eʼtirofiga sazovor bo‘ldi.

Festivalning badiiy qismida harbiy orkestr jamoalari hamda taniqli sanʼatkorlar Vatanga muhabbatni tarannum ettiruvchi kuy-qo‘shiqlari bilan ishtirokchilarga bayramona kayfiyat ulashdi.

Festivalning ahamiyatli jihatlaridan biri bu- barchani birlashtirgan tadbirga nafaqat yoshlar, maktab o‘quvchilari balki Mehribonlik va Oilaviy bolalar uyi farzandlari ham taklif etilganligi bo‘ldi.

Bu kabi tadbirlarning tashkil etilishi yoshlar ongiga vatanparvarlik tuyg‘ularini yana-da singdirishga, isteʼdodli yoshlarni rag‘batlantirishga, yangi iqtidor egalarini aniqlashga, eng asosiysi uyushmgan yoshlarning bo‘sh vaqtlarini mazmunli tashkil etishga keng zamin yaratmoqda.

Yoshlar maʼnaviyatini yuksaltirishdek ezgu maqsadni ko‘zlovchi ushbu festival mamlakatimiz bo‘ylab qizg‘in davom etmoqda.