Республика миқёсида “Янги Ўзбекистон — ёшлар мамлакати!» шиори остидаги “Ёшлар фестивали” давом этиб, унда Миллий гвардия ҳамда куч тузилмалари фаол иштирок этмоқда
Ёшлар ойлиги доирасида жойларда турли маданий-маърифий, кўнгилочар тадбирлар, спорт мусобақалари ҳамда учрашувлар ўтказилиши режалаштирилган.
Ҳарбий-ватанпарварлик фестивалида вилоят ҳокимлари, Ўзбекистон ёшлар ишлари агентлиги директори ва вакиллари ҳамда масъул раҳбарлар иштирок этиб, мамлакатимизда ёшлар учун яратилаётган имкониятлар ҳақида сўз юритилди. Иқтидор эгаларига ўз мақсадларига эришиш йўлида муҳим ўрин тутадиган керакли тавсиялар билан ўзига хос мотивация берилди.
Шунингдек, тадбир доирасида ҳарбий хизматчилар томонидан ҳарбий техникалар билан кўча бўйлаб марш юришлари намойиш этилди. Фестиваль шукуҳи спортсеварларни ҳам четлаб ўтмади. Чавандозлик маҳорат дарслари, спортнинг камондан отиш тури бўйича ташкиллаштирилган мусобақалар барча ёшларда катта қизиқиш уйғотиб, фаол ўғил-қизлар ўз имкониятларини синовдан ўтказишди.Ҳарбий хизматчиларнинг хизмат итлари билан кўрсатган чиқишлари барчанинг эътирофига сазовор бўлди.
Фестивалнинг бадиий қисмида ҳарбий оркестр жамоалари ҳамда таниқли санъаткорлар Ватанга муҳаббатни тараннум эттирувчи куй-қўшиқлари билан иштирокчиларга байрамона кайфият улашди.
Фестивалнинг аҳамиятли жиҳатларидан бири бу- барчани бирлаштирган тадбирга нафақат ёшлар, мактаб ўқувчилари балки Меҳрибонлик ва Оилавий болалар уйи фарзандлари ҳам таклиф этилганлиги бўлди.
Бу каби тадбирларнинг ташкил этилиши ёшлар онгига ватанпарварлик туйғуларини янада сингдиришга, истеъдодли ёшларни рағбатлантиришга, янги иқтидор эгаларини аниқлашга, энг асосийси уюшмган ёшларнинг бўш вақтларини мазмунли ташкил этишга кенг замин яратмоқда.
Ёшлар маънавиятини юксалтиришдек эзгу мақсадни кўзловчи ушбу фестиваль мамлакатимиз бўйлаб қизғин давом этмоқда.
