MODDIY-TEXNIK TAʼMINOTI MARKAZIY BAZASINING YANGI BINOSI FOYDALANISHGA TOPSHIRILDI
O‘zbekiston Respublikasi Prezidenti qaroriga muvofiq, 2017 yilda Milliy gvardiya moddiy-texnik taʼminoti Markaziy bazasi tashkil qilingan edi. Bugun ushbu Markaziy bazaning zamonaviy ko‘rinishda qad rostlagan yangi maʼmuriy binosining tantanali ochilish marosimi bo‘lib o‘tdi.
Unda Milliy gvardiya qo‘mondoni general-mayor R.Djurayev, Chilonzor tumani hokimining yoshlar masalalari bo‘yicha o‘rinbosari A.Xolmedov hamda qurilish tashkiloti taʼsischilari va boshqa bir qator soha mutasaddilari ishtirok etdi.
Tadbir boshida qo‘mondon asosiy vazifasi – Milliy gvardiya tuzilmalariga zarur tovar-moddiy boyliklar, qurol-aslaha va harbiy texnikalarni yetkazib berish bo‘lgan Markaziy baza zamon talablaridan kelib chiqib, xizmat ko‘rsatishning yuqori darajalariga chiqishi lozimligi, zero, mustahkam moddiy-texnika bazasi har qanday vazifani tezkorlikda va puxta bajarishning asosiy omillaridan biri ekanligini taʼkidladi.
Shundan so‘ng, Markaziy bazaning bir guruh harbiy xizmatchi va askarlari Harbiy orkestr musiqa sadolari ostida namunali xizmatlari uchun ko‘krak nishoni, faxriy yorliq, tashakkurnoma hamda esdalik soatlari bilan rag‘batlantirildi.
Tadbir so‘nggida, barcha ishtirokchilar bunyod etilgan yangi uch qavatli maʼmuriy binoda harbiy xizmatchi hamda muddatli harbiy xizmatni o‘tayotgan askarlar uchun yaratilgan shart-sharoitlar bilan tanishdilar.
