МОДДИЙ-ТЕХНИК ТАЪМИНОТИ МАРКАЗИЙ БАЗАСИНИНГ ЯНГИ БИНОСИ ФОЙДАЛАНИШГА ТОПШИРИЛДИ
Ўзбекистон Республикаси Президенти қарорига мувофиқ, 2017 йилда Миллий гвардия моддий-техник таъминоти Марказий базаси ташкил қилинган эди. Бугун ушбу Марказий базанинг замонавий кўринишда қад ростлаган янги маъмурий биносининг тантанали очилиш маросими бўлиб ўтди.
Унда Миллий гвардия қўмондони генерал-майор Р.Джураев, Чилонзор тумани ҳокимининг ёшлар масалалари бўйича ўринбосари А.Холмедов ҳамда қурилиш ташкилоти таъсисчилари ва бошқа бир қатор соҳа мутасаддилари иштирок этди.
Тадбир бошида қўмондон асосий вазифаси – Миллий гвардия тузилмаларига зарур товар-моддий бойликлар, қурол-аслаҳа ва ҳарбий техникаларни етказиб бериш бўлган Марказий база замон талабларидан келиб чиқиб, хизмат кўрсатишнинг юқори даражаларига чиқиши лозимлиги, зеро, мустаҳкам моддий-техника базаси ҳар қандай вазифани тезкорликда ва пухта бажаришнинг асосий омилларидан бири эканлигини таъкидлади.
Шундан сўнг, Марказий базанинг бир гуруҳ ҳарбий хизматчи ва аскарлари Ҳарбий оркестр мусиқа садолари остида намунали хизматлари учун кўкрак нишони, фахрий ёрлиқ, ташаккурнома ҳамда эсдалик соатлари билан рағбатлантирилди.
Тадбир сўнггида, барча иштирокчилар бунёд этилган янги уч қаватли маъмурий бинода ҳарбий хизматчи ҳамда муддатли ҳарбий хизматни ўтаётган аскарлар учун яратилган шарт-шароитлар билан танишдилар.
