Milliy gvardiya Ma’naviyat va ma’rifat markazida Buyuk Britaniyaning O‘zbekistondagi elchixonasi harbiy apparati bilan hamkorlikda Buyuk Britaniya Qirolligi Yorkshir polki orkestri va O‘zbekiston Respublikasi Milliy gvardiyasi alohida namunali-ko‘rgazmali harbiy orkestri jamoasi ishtirokida "Ohanglar sadosi" nomli navbatdagi konsert dasturi bo‘lib o‘tdi.
Ushbu madaniy tadbirda Milliy gvardiya qo‘mondoni o‘rinbosari S.Mamayusupov, Buyuk Britaniyaning O‘zbekistondagi favqulodda va muxtor elchisi Timoti Smart, Buyuk Britaniyaning O‘zbekistondagi harbiy atashesi Robin Stedmen shuningdek, hamkor vazirliklarning soxaga oid mutasaddilari, Milliy gvardiya harbiy musiqa akademik litseyi va Toshkent "Temurbeklar maktabi" o‘quvchilari, shuningdek tizim harbiy xizmatchi va xodimlari ishtirok etishdi.
Mahoratli harbiy dirijyorlar - mayor Ramil Asfandiyarov va Britaniya Imperiyasining yuqori darajali ordeni sohibi, kapitan Garri Kleg rahbarligida orkestrlar tomonidan harbiy yurishlar va zamonaviy musiqiy kompozitsiyalardan iborat improvizatsiyalar ijro etildi.
Konsert davomida ijro etilgan o‘ndan ortiq betakror ohanglar tomoshabinlarni musiqa olamiga sho‘ng‘ish barobarida, ularga unutilmas taassurotlar hadya etdi.
Ijodiy uchrashuv orqali tomonlar o‘zaro hamkorlikning yangi istiqbollarini muhokama qilish, shuningdek, kelgusida tantanali tadbirlarni tashkil etishda tajriba almashish imkoniga ega bo‘ldilar.