Inson uchun kindik qoni tomgan Vatani, dunyoga keltirib voyaga yetkazgan ota-onasi qanchalik aziz va mukarram bo‘lsa, uning o‘zligi va maʼnaviy olamini belgilaydigan ona tili ham shunchalik qadrli va moʻtabardir.

Qadim turkiy tilimizni ilk bor ilmiy asosda tadqiq etgan buyuk alloma Mahmud Qoshg‘ariyning: «Erdam boshi tildur», yaʼni «Barcha ezguliklar tildan boshlanur», degan so‘zlarida teran haqiqat mujassam. Darhaqiqat, odamzot qalbidagi jamiki olijanob fazilatlar ona tilining betakror moʻjizasi, sehri va jozibasi bilan kamolga yetadi.

Xalqimiz tafakkurining tiniq ko‘zgusi bo‘lgan bu bebaho xazinani asrab-avaylash va rivojlantirish bugungi kundagi eng sharafli vazifalarimizdan biridir.

Ulug‘ mutafakkir Mir Alisher Navoiy bobomizning: «Tilga eʼtibor – elga eʼtibor», degan dono o‘gitlariga amal qilgan holda, yurtimizda til masalasida olib borilayotgan davlat siyosati inson qadrini ulug‘lashga qaratilgan tub islohotlarimizga har tomonlama uyg‘un va hamohangdir.

Taʼkidlash kerakki, ushbu sana har yili butun respublikamiz bo‘ylab o‘zgacha kayfiyatda nishonlanadi. Jumladan, “Turon” axborot kutubxona markazida O‘zbekiston Respublikasi Milliy gvardiyasi va “Turon” axborot kutubxona markazi hamkorligida 21 oktyabr “O‘zbek tili bayrami kuni” munosabati bilan “Til - millat va maʼnaviyat ko‘zgusi” mavzusidagi insholar tanlovi hamda maʼnaviy-maʼrifiy tadbir bo‘lib o‘tdi.

Tadbirda, O‘zbekiston Respublikasi Milliy gvardiyasi qo‘mondonligi “Turon” axborot kutubxona markazi rahbariyati, Milliy gvardiya “Temurbeklar maktabi” va “Harbiy musiqa” akademik litseyi o‘quvchilari hamda muddatli harbiy xizmatchilar ishtirok etdi.

Ushbu tadbirga tashrif buyurganlar dastlab Abdulla Qodiriy memorial muzeyi faoliyati bilan tanishdilar.

Shundan so‘ng, Milliy gvardiya “Temurbeklar maktabi” va “Harbiy musiqa” akademik litseyi o‘quvchilari hamda muddatli harbiy xizmatchilar o‘rtasida “Til - millat va maʼnaviyat ko‘zgusi” mavzusida insholar tanlovi bo‘lib o‘tdi. Insholar tanlovida ishtirok etganlar tilimizning paydo bo‘lishi va shakllanish tarixi, o‘zbek tili rivoji va taraqqiyoti yo‘lida amalga oshirilishi lozim bo‘lgan chora-tadbirlar va islohotlar bo‘yicha o‘z fikr mulohazalirini bildirdilar.

Tadbirning badiiy qismda esa, Milliy gvardiya Temurbeklar maktabi harbiy akademik litseyi o‘quvchilari tomonidan o‘zbek tili rivojiga hissa qo‘shgan buyuk adiblarimiz hayoti va ijodiga bag‘ishlangan sahna ko‘rinishi, Milliy gvardiya Harbiy musiqa akademik litseyi o‘quvchilari tomonidan badiiy va musiqiy chiqishlar yig‘ilganlar eʼtiboriga havola etildi.

Tadbir so‘ngida Milliy gvardiya “Temurbeklar maktabi” va “Harbiy musiqa” akademik litseyi o‘quvchilari hamda muddatli harbiy xizmatchilar o‘rtasida “Til - millat va maʼnaviyat ko‘zgusi” mavzusida o‘tkazilgan insholar tanlovining yakuniy natijalari eʼlon qilinib, g‘olib va sovrindorlar diplom va esdalik sovg‘alari bilan taqdirlandilar.