Инсон учун киндик қони томган Ватани, дунёга келтириб вояга етказган ота-онаси қанчалик азиз ва мукаррам бўлса, унинг ўзлиги ва маънавий оламини белгилайдиган она тили ҳам шунчалик қадрли ва мўътабардир.
Қадим туркий тилимизни илк бор илмий асосда тадқиқ этган буюк аллома Маҳмуд Қошғарийнинг: «Эрдам боши тилдур», яъни «Барча эзгуликлар тилдан бошланур», деган сўзларида теран ҳақиқат мужассам. Дарҳақиқат, одамзот қалбидаги жамики олижаноб фазилатлар она тилининг бетакрор мўъжизаси, сеҳри ва жозибаси билан камолга етади.
Халқимиз тафаккурининг тиниқ кўзгуси бўлган бу бебаҳо хазинани асраб-авайлаш ва ривожлантириш бугунги кундаги энг шарафли вазифаларимиздан биридир.
Улуғ мутафаккир Мир Алишер Навоий бобомизнинг: «Тилга эътибор – элга эътибор», деган доно ўгитларига амал қилган ҳолда, юртимизда тил масаласида олиб борилаётган давлат сиёсати инсон қадрини улуғлашга қаратилган туб ислоҳотларимизга ҳар томонлама уйғун ва ҳамоҳангдир.
Таъкидлаш керакки, ушбу сана ҳар йили бутун республикамиз бўйлаб ўзгача кайфиятда нишонланади. Жумладан, “Турон” ахборот кутубхона марказида Ўзбекистон Республикаси Миллий гвардияси ва “Турон” ахборот кутубхона маркази ҳамкорлигида 21 октябрь “Ўзбек тили байрами куни” муносабати билан “Тил - миллат ва маънавият кўзгуси” мавзусидаги иншолар танлови ҳамда маънавий-маърифий тадбир бўлиб ўтди.
Тадбирда, Ўзбекистон Республикаси Миллий гвардияси қўмондонлиги “Турон” ахборот кутубхона маркази раҳбарияти, Миллий гвардия “Темурбеклар мактаби” ва “Ҳарбий мусиқа” академик лицейи ўқувчилари ҳамда муддатли ҳарбий хизматчилар иштирок этди.
Ушбу тадбирга ташриф буюрганлар дастлаб Абдулла Қодирий мемориал музейи фаолияти билан танишдилар.
Шундан сўнг, Миллий гвардия “Темурбеклар мактаби” ва “Ҳарбий мусиқа” академик лицейи ўқувчилари ҳамда муддатли ҳарбий хизматчилар ўртасида “Тил - миллат ва маънавият кўзгуси” мавзусида иншолар танлови бўлиб ўтди. Иншолар танловида иштирок этганлар тилимизнинг пайдо бўлиши ва шаклланиш тарихи, ўзбек тили ривожи ва тараққиёти йўлида амалга оширилиши лозим бўлган чора-тадбирлар ва ислоҳотлар бўйича ўз фикр мулоҳазалирини билдирдилар.
Тадбирнинг бадиий қисмда эса, Миллий гвардия Темурбеклар мактаби ҳарбий академик лицейи ўқувчилари томонидан ўзбек тили ривожига ҳисса қўшган буюк адибларимиз ҳаёти ва ижодига бағишланган саҳна кўриниши, Миллий гвардия Ҳарбий мусиқа академик лицейи ўқувчилари томонидан бадиий ва мусиқий чиқишлар йиғилганлар эътиборига ҳавола этилди.
Тадбир сўнгида Миллий гвардия “Темурбеклар мактаби” ва “Ҳарбий мусиқа” академик лицейи ўқувчилари ҳамда муддатли ҳарбий хизматчилар ўртасида “Тил - миллат ва маънавият кўзгуси” мавзусида ўтказилган иншолар танловининг якуний натижалари эълон қилиниб, ғолиб ва совриндорлар диплом ва эсдалик совғалари билан тақдирландилар.