Toshkent shahrida 28 iyul kuni soat 10.00 da Sergeli tumanida joylashgan avtomobil ehtiyot qismlari bozorida jamoat tartibi va fuqarolar xavfsizligini taʼminlayotgan Milliy gvardiya xodimlari tashqi kuzatuv kamerasi bozorga kelganlar orasida jinoyat sodir etganligi uchun qidirilayotgan shaxsni qayd etganligi to‘g‘risida maʼlumot olishdi.

Milliy gvardiya va ichki ishlar organlari xodimlari Yunusobod tumani prokuraturasi tomonidan qidiruvga berilgan E. S. ni qo‘lga olish choralarini tezkorlik bilan ko‘rishdi. Ushbu shaxs Yangiyo‘l shahrida tug‘ilgan 21 yoshli fuqaro bo‘lib, O‘zbekiston Respublikasi Jinoyat kodeksining 168 (“Firibgarlik”) va 228 ("Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish") moddalarida nazarda tutilgan jinoyatlarni sodir etganlikda ayblangan.

Qo‘lga olingan shaxs qidiruv tashabbuskoriga topshirish uchun Sergeli tumani ichki ishlar bo‘limiga olib borilgan.

Ushbu kuni kechki payt Chilonzor tumanidagi G‘ofura G‘ulom nomidagi hiyobonda jamoat joylaridagi huquq-tartibot va fuqarolarning osoyishtaligini taʼminlash bo‘yicha xizmat olib borayotgan Milliy gvardiya va ichki ishlar organlari xodimlari Sirdaryo viloyatida tug‘ilgan, transport vositasini o‘g‘irlaganligi uchun qidiruvda bo‘lgan U. R. ni qo‘lga olishdi.

Qo‘lga olingan shaxs belgilangan tartibda Chilonzor tumani IIO FMBga yetkazildi.