Тошкентда Миллий гвардия ва Ички ишлар органлари ходимлари жиноят содир этганлиги учун қидирилаётган шахсларни қўлга олишди
Тошкент шаҳрида 28 июль куни соат 10.00 да Сергели туманида жойлашган автомобиль эҳтиёт қисмлари бозорида жамоат тартиби ва фуқаролар хавфсизлигини таъминлаётган Миллий гвардия ходимлари ташқи кузатув камераси бозорга келганлар орасида жиноят содир этганлиги учун қидирилаётган шахсни қайд этганлиги тўғрисида маълумот олишди.
Миллий гвардия ва ички ишлар органлари ходимлари Юнусобод тумани прокуратураси томонидан қидирувга берилган Э. С. ни қўлга олиш чораларини тезкорлик билан кўришди. Ушбу шахс Янгийўл шаҳрида туғилган 21 ёшли фуқаро бўлиб, Ўзбекистон Республикаси Жиноят кодексининг 168 ("Фирибгарлик") ва 228 ("Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш") моддаларида назарда тутилган жиноятларни содир этганликда айбланган.
Қўлга олинган шахс қидирув ташаббускорига топшириш учун Сергели тумани ички ишлар бўлимига олиб борилган.
Ушбу куни кечки пайт Чилонзор туманидаги Ғофура Ғулом номидаги ҳиёбонда жамоат жойларидаги ҳуқуқ-тартибот ва фуқароларнинг осойишталигини таъминлаш бўйича хизмат олиб бораётган Миллий гвардия ва ички ишлар органлари ходимлари Сирдарё вилоятида туғилган, транспорт воситасини ўғирлаганлиги учун қидирувда бўлган У. Р. ни қўлга олишди.
Қўлга олинган шахс белгиланган тартибда Чилонзор тумани ИИО ФМБга етказилди.
