ULUG‘VOR MAQSADLAR TARG‘IBOTI
Kuni kecha Termiz shahridagi 12-sonli Mehribonlik uyida Milliy gvardiya Surxondaryo viloyati bo‘yicha boshqarmasi, Qo‘riqlash boshqarmasi hamda Yoshlar ishlari agentligi hamkorligida tarbiyalanuvchilar uchun “Men ham harbiy bo‘laman!” mavzusida maʼnaviy-maʼrifiy va sport tadbirlari tashkil etildi.
Tadbirda dastlab, Milliy gvardiya Surxondaryo viloyati bo‘yicha boshqarmasi boshlig‘i podpolkovnik Sh.Saidov yoshlar bilan suhbat qurdi. Ochiq va samimiy kechgan muloqotda ularning qiziqtirgan savollariga batafsil javob va maʼlumotlar berilib, takliflar tinglandi.
Milliy gvardiya safida xizmat qilish istagida bo‘lgan yoshlarga zarur tavsiyalar berilib, bir guruh faol yoshlarga badiiy kitoblar jamlanmasi sovg‘a qilindi.
Shuningdek, tadbir doirasida namoyish etilgan harbiylarning qo‘l jangi bo‘yicha sahnalashtirilgan chiqishlari yig‘ilganlarga ko‘tarinki kayfiyat bag‘ishladi.
Tadbir yakunida jangovar texnika va qurol-aslahalar ko‘rgazmasi tashkil etilib, o‘g‘il-qizlar ular bilan yaqindan tanishdilar, harbiylar va xodimlarning sharafli vazifalariga oid qiziqarli maʼlumotlarga ega bo‘ldilar. Yosh avlodning vatanparvarlik ruhida kamol topishiga xizmat qiluvchi bu kabi tadbirlar respublikamiz bo‘ylab davom etmoqda.
