УЛУҒВОР МАҚСАДЛАР ТАРҒИБОТИ
Куни кеча Термиз шаҳридаги 12-сонли Меҳрибонлик уйида Миллий гвардия Сурхондарё вилояти бўйича бошқармаси, Қўриқлаш бошқармаси ҳамда Ёшлар ишлари агентлиги ҳамкорлигида тарбияланувчилар учун “Мен ҳам ҳарбий бўламан!” мавзусида маънавий-маърифий ва спорт тадбирлари ташкил этилди.
Тадбирда дастлаб, Миллий гвардия Сурхондарё вилояти бўйича бошқармаси бошлиғи подполковник Ш.Саидов ёшлар билан суҳбат қурди. Очиқ ва самимий кечган мулоқотда уларнинг қизиқтирган саволларига батафсил жавоб ва маълумотлар берилиб, таклифлар тингланди.
Миллий гвардия сафида хизмат қилиш истагида бўлган ёшларга зарур тавсиялар берилиб, бир гуруҳ фаол ёшларга бадиий китоблар жамланмаси совға қилинди.
Шунингдек, тадбир доирасида намойиш этилган ҳарбийларнинг қўл жанги бўйича саҳналаштирилган чиқишлари йиғилганларга кўтаринки кайфият бағишлади.
Тадбир якунида жанговар техника ва қурол-аслаҳалар кўргазмаси ташкил этилиб, ўғил-қизлар улар билан яқиндан танишдилар, ҳарбийлар ва ходимларнинг шарафли вазифаларига оид қизиқарли маълумотларга эга бўлдилар. Ёш авлоднинг ватанпарварлик руҳида камол топишига хизмат қилувчи бу каби тадбирлар республикамиз бўйлаб давом этмоқда.
