O‘zbekiston Respublikasi Qurolli Kuchlari tashkil etilganligining 34 yilligi hamda 14 yanvar — Vatan himoyachilari kuni munosabati bilan Milliy gvardiya tizimida “Saf tayyorgarligi bo‘yicha eng ilg‘or bo‘linma” ko‘rik-tanlovi tashkil etildi.

Prezidentimiz — Qurolli Kuchlar Oliy Bosh Qo‘mondonining 2025 yil 14 fevraldagi farmoniga muvofiq Qurolli Kuchlar tizimida joriy qilingan yangi Saf nizomi asosida Milliy gvardiyada ikkinchi marotaba “Saf tayyorgarligi bo‘yicha eng ilg‘or bo‘linma” ko‘rik-tanlovi uch bosqichda — harbiy qismlar, mintaqaviy hamda respublika bosqichida o‘tkazildi.

Poytaxtimizda bo‘lib o‘tgan respublika bosqichi sinovlari Jamoat xavfsizligi universiteti bazasida tashkil etilib, unda jamoalarning saf qoidalarini o‘zlashtirganlik darajasi baholandi. Musobaqa jarayonida yakka tartibda qurol va qurolsiz saf usullarini namoyish etish, saf qo‘shig‘ini tantanali ijro etish, jangovar hayqiriq hamda qurol bilan ko‘rgazmali chiqish usullarini bajarish kabi shartlar amalda ko‘rsatildi.

Mazkur ko‘rik-tanlovning final bosqichi va g‘oliblarni taqdirlash marosimi Ichki ishlar vazirligi tasarrufidagi “JAR” sport majmuasida bo‘lib o‘tdi.

Tantanali marosimda Milliy gvardiya qo‘mondoni general-mayor R.Djurayev,   Oliy Majlisi Qonunchilik palatasi Xalqaro ishlar, mudofaa va xavfsizlik masalalari qo‘mitasi raisi U.Shermatov, Xavfsizlik kengashi mas’ul xodimi D.Jalilov, Mudofaa vaziri birinchi o‘rinbosari general-mayor Z.Iminov, Mudofaa vaziri o‘rinbosari general-mayor H.Qarshiyev, Davlat bojxona qo‘mitasi raisi o‘rinbosari  polkovnik O.Choriyev, Favqulodda vaziyatlar vazirining o‘rinbosari polkovnik N.Qodirov, Ichki ishlar vazirligi Qorovul qo‘shinlari qo‘mondoni polkovnik X.Batirov, iste’fodagi general-mayor R.Ataxanov,   prokuratura va Davlat xavfsizlik xizmati mas’ul xodimlari, Milliy gvardiya qo‘mondonligi va boshqarma boshliqlari, harbiy qism komandirlari, faxriylar,  gvardiyachilar va hamkor vazirliklarning harbiy xizmatchi va xodimlari, harbiy oliy ta’lim muassasalari kursantlari va “Temurbeklar maktabi” o‘quvchilari, shuningdek, poytaxtimizdagi Mehribonlik uyi tarbiyalanuvchilari ishtirok etishdi.

Tadbir davomida mehmonlar e’tiboriga gvardiyachilar tomonidan tayyorlangan amaliy ko‘rgazmali chiqishlar, harbiy orkestr ishtirokidagi musiqali kompozitsiyalar taqdim etildi. Respublika bosqichiga yetib kelgan jamoalar tomonidan saf nizomiga kiritilgan yangi saf usullarining mohirona ijro etilishi, shuningdek Faxriy qorovul bataloni jamoasining namunali chiqishlari barchada katta taassurot qoldirdi. Quvonarlisi, mazkur ko‘rik-tanlovda gvardiyachi qizlarning ham ishtirok etgani tizimda gender tenglik masalalariga alohida e’tibor qaratilayotganining yaqqol dalili bo‘ldi.

Ko‘rik tanloviga kiritilgan jamoa bilan ko‘rgazmali chiqishlar sharti esa barchada qiziqish uyg‘otib, bo‘linmalarning bir butun bo‘lib harakat qilgan holda birdamlik va jipsliklarini namoyon etdi.   

Yakunda g‘olib va sovrindorlarni taqdirlash marosimi o‘tkazildi. Unga ko‘ra, 3-o‘rin Milliy gvardiya Farg‘ona viloyati bo‘yicha boshqarmasi jamoasi va “Sarboz” jamoasiga, 2-o‘rin Milliy gvardiya Qoraqalpog‘iston Respublikasi bo‘yicha boshqarmasi jamoasiga  nasib etdi. Faxrli 1-o‘rinni esa Milliy gvardiya Jamoat xavfsizligi universiteti jamoasi qo‘lga kiritdi.

Ushbu ko‘rik-tanlov Milliy gvardiya tizimida saf tayyorgarligini yanada takomillashtirish, shaxsiy tarkibning kasbiy mahoratini oshirish hamda harbiy intizom va vatanparvarlik ruhini mustahkamlashda muhim ahamiyat kasb etadi. Bunday tadbirlar gvardiyachilarning jismoniy va ma’naviy tayyorgarligini yuksaltirish, yangi Saf nizomi talablarini amaliyotga samarali joriy etishga xizmat qilishi bilan ahamiyatlidir.

Kelgusida ham bu kabi ko‘rik-tanlovlarni muntazam tashkil etish orqali Milliy gvardiya bo‘linmalari o‘rtasida sog‘lom raqobatni kuchaytirish, yosh avlodni harbiy sohaga qiziqtirish va Vatanga sadoqat ruhida tarbiyalashga qaratilgan chora-tadbirlar izchil davom ettirilishi belgilab olindi.