O‘zbekiston Respublikasi Qurolli Kuchlari tashkil etilganligining 32 yilligini hamda 14 yanvar – Vatan himoyachilari kuni munosabati bilan qator harbiy-vatanparvarlik tadbirlari o‘tkazilmoqda. Milliy gvardiyaning Toshkent viloyati Qibray tumanida joylashgan harbiy qismida ham ana shunday “Ochiq eshiklar kuni” tadbiri va sport musobaqalari tashkil etildi. Dastavval harbiy qism madaniyat saroyida maʼnaviy-maʼrifiy tadbir bo‘lib o‘tdi. Tadbir davomida Toshkent tumanida joylashgan 8, 22, 23, 26, 28, 29-umumiy o‘rta taʼlim maktabi va Milliy gvardiyaga biriktirilgan Parkent tumanidagi 5-sonli maktabdan tashrif buyurgan o‘quvchilar harbiy orkestr va harbiy xizmatchilar tomonidan amalga oshirilgan saf chiqishlari va Milliy gvardiya faoliyatiga oid video filmni tomosha qilishib, o‘zlari uchun katta taassurotlarga ega bo‘lishdi. Shu bilan birga, o‘quvchilar ham o‘zlari tayyorlab kelgan qo‘l jangi usullarini namoyish etishdi.

Tadbirning ikkinchi qismi harbiy anjom aslahalar ko‘rgazmasi bilan davom etdi.

Shundan so‘ng, sport saroyida "Vatan tayanchi" bolalar va o‘smirlar harbiy-vatanparvarlik harakati otryadlari o‘rtasida “Vatanparvarlar” harbiy-sport musobaqasi o‘tkazildi. Musobaqalar uchta shart asosida bo‘lib o‘tdi. Jumladan Arqon tortish, arm-reystling va Mudofaaga ko‘maklashuvchi “Vatanparvar” tashkiloti Toshkent viloyati tasarrufidagi Keles o‘quv-sport texnika klubi bilan hamkorlikda mohir merganlar bellashuvlari tashkil etildi.

Yakunda tadbirning faol ishtirokchilari va musobaqalarida g‘olib bo‘lgan o‘quvchilarga tashkilotchilar tomonidan diplom va esdalik sovg‘alari topshirildi.