YOSHLAR OT SPORTIGA KENG JALB ETILMOQDA
Ayni vaqtda o‘smirlar va yoshlarni ot sporti, zamonaviy beshkurash, polo va uloq-ko‘pkari bilan muntazam shug‘ullanishga jalb etish, iqtidorli yoshlarni aniqlash ishlariga alohida eʼtibor qaratilib, bu borada amaliy harakatlar boshlab yuborilgan.
Respublikamizdagi ot sporti mahorati maktablari faoliyatini rivojlantirish, yosh avlod chavandozlarini tarbiyalashga yo‘naltirilgan milliy ot sporti musobaqalarini tashkil etish va o‘tkazish borasidagi ishlar Milliy gvardiya bo‘linmalari tomonidan manzilli ravishda olib borilmoqda.
“O‘zbegim otlari” ot zavodi ippodromida Milliy gvardiya Toshkent viloyati bo‘yicha boshqarmasi boshlig‘i kubogi uchun tashkil etilgan musobaqada 40 dan ziyod otlarda sportchilar bellashuvlarga kirishdi.
Musobaqada yosh chavandozlar ot choptirish borasida hudud yoshlariga mahorat maktabi o‘tab berishdi. Ularning harakatlari bolalarda katta taassurot qoldirdi. Sportchilar boshqaruvida ippodrom uzra axal-taka, ingliz, arab va qorabayir zotdor otlari yeldek uchib o‘tishdi.
Tadbir so‘ngida har bir masofa bo‘yicha g‘olib bo‘lgan ot sporti ustalariga esdalik sovg‘alari topshirildi. Tashkilotchilar esa bu kabi musobaqalarni muntazam ravishda o‘tkazishga kelishib olishdi.
