O‘zbekiston Respublikasi Qurolli Kuchlari tizimidagi “Temurbeklar maktabi” va “Yosh chegarachi” harbiy-akademik litseylari o‘quvchilari o‘rtasida bo‘lib o‘tgan “MEN G‘OLIB” yugurish marafonida Milliy gvardiya “Temurbeklar maktabi” jamoasi faxrli 1- o‘rinni qo‘lga kiritdi.
Poytaxtimizning Mirobod tumani Yangizamon ko‘chasida Sohibqiron Amir Temur tavalludining 687 yilligi munosabati bilan O‘zbekiston Respublikasi Milliy gvardiyasi, Davlat xavfsizlik xizmati, Mudofaa, Ichki ishlar, Favqulodda vaziyatlar vazirliklari “Temurbeklar maktabi” va “Yosh chegarachi” harbiy-akademik litseylari o‘quvchilari o‘rtasida “MEN G‘OLIB” shiori ostida 5 ming metr masofaga yugurish marafoni o‘tkazildi.
Erta tongdan mazkur tadbirga sog‘lom hayot tarziga va sportga oshno bo‘lgan 1,5 mingga yaqin fuqarolar ishtirok etish uchun tashrif buyurishdi. Shu bilan bir qatorda, marafonda harbiy xizmatchi va xodimlar hamda ularning oila aʼzolari, Toshkent shahrida joylashgan 22-sonli Mehribonlik uyi tarbiyalanuvchilari, mahalliy aholi yoshlari ham ishtirok etdi.
Marafon boshlanishi avvalida maxsus sahnalar va dekoratsiyalar, xonandalarning chiqishlari tadbirga o‘zgacha shukuh bag‘ishladi. Yoshlarning ko‘zlarida g‘alabaga bo‘lgan intilish hayajoni sezilib turardi. Yugurish musobaqalari ikki bosqichda o‘tkazildi. Dastavval O‘zbekiston Respublikasi Qurolli Kuchlari tizimidagi “Temurbeklar maktabi” va “Yosh chegarachi” harbiy-akademik litseylari o‘quvchilari o‘rtasida 5 ming metr masofaga yugurishga start berildi. Barcha jamoalar g‘oliblik uchun astoydil kurash olib bordi. Finishga esa birinchi bo‘lib Milliy gvardiya “Temurbeklar maktabi” o‘quvchisi kirib keldi.
Shundan so‘ng, ommaviy yugurish bahslari bo‘lib o‘tdi. Unda ishtirokchilar 3 ming metr masofada o‘z imkoniyatlarini sinab ko‘rishdi. Marafonda yugurish yo‘lagiga chiqqan eng yoshi kichik ishtirokchidan tortib, eng yoshi kattasigacha barchasi Yengil atletika federatsiyasi hakamlari tomonidan nazorat qilib borildi.
Marafon natijalariga ko‘ra:
3-o‘rinni Davlat xavfchilik xizmat Chegara qo‘shinlari “Yosh chegarachi” harbiy-akademik litsey, 2-o‘rinni Favqulodda vaziyatlar vazirligi “Temurbeklar maktabi”
1-o‘rinni Milliy gvardiya “Temurbeklar maktabi” jamoalari qo‘lga kiritishdi. G‘oliblar tashkilotchilar tomonidan medal, diplom va qimmatbaho sovg‘alar bilan taqdirlandi. Shuningdek ommaviy yugurish bahslarida ham nominatsiyalar bo‘yicha g‘oliblar munosib rag‘batlantirildi.
Barchaga g‘oliblik sari kurashchanlik ruhini bag‘ishlagan tadbir Milliy gvardiya ashula va raqs ansambli xonandalari kuy qo‘shiqlari bilan davom ettirildi.
