Ўзбекистон Республикаси Қуролли Кучлари тизимидаги “Темурбеклар мактаби” ва “Ёш чегарачи” ҳарбий-академик лицейлари ўқувчилари ўртасида бўлиб ўтган “МЕН ҒОЛИБ” югуриш марафонида Миллий гвардия “Темурбеклар мактаби” жамоаси фахрли 1- ўринни қўлга киритди.
Пойтахтимизнинг Миробод тумани Янгизамон кўчасида Соҳибқирон Амир Темур таваллудининг 687 йиллиги муносабати билан Ўзбекистон Республикаси Миллий гвардияси, Давлат хавфсизлик хизмати, Мудофаа, Ички ишлар, Фавқулодда вазиятлар вазирликлари “Темурбеклар мактаби” ва “Ёш чегарачи” ҳарбий-академик лицейлари ўқувчилари ўртасида “МЕН ҒОЛИБ” шиори остида 5 минг метр масофага югуриш марафони ўтказилди.
Эрта тонгдан мазкур тадбирга соғлом ҳаёт тарзига ва спортга ошно бўлган 1,5 мингга яқин фуқаролар иштирок этиш учун ташриф буюришди. Шу билан бир қаторда, марафонда ҳарбий хизматчи ва ходимлар ҳамда уларнинг оила аъзолари, Тошкент шаҳрида жойлашган 22-сонли Меҳрибонлик уйи тарбияланувчилари, маҳаллий аҳоли ёшлари ҳам иштирок этди.
Марафон бошланиши аввалида махсус саҳналар ва декорациялар, хонандаларнинг чиқишлари тадбирга ўзгача шукуҳ бағишлади. Ёшларнинг кўзларида ғалабага бўлган интилиш ҳаяжони сезилиб турарди. Югуриш мусобақалари икки босқичда ўтказилди. Даставвал Ўзбекистон Республикаси Қуролли Кучлари тизимидаги “Темурбеклар мактаби” ва “Ёш чегарачи” ҳарбий-академик лицейлари ўқувчилари ўртасида 5 минг метр масофага югуришга старт берилди. Барча жамоалар ғолиблик учун астойдил кураш олиб борди. Финишга эса биринчи бўлиб Миллий гвардия “Темурбеклар мактаби” ўқувчиси кириб келди.
Шундан сўнг, оммавий югуриш баҳслари бўлиб ўтди. Унда иштирокчилар 3 минг метр масофада ўз имкониятларини синаб кўришди. Марафонда югуриш йўлагига чиққан энг ёши кичик иштирокчидан тортиб, энг ёши каттасигача барчаси Енгил атлетика федерацияси ҳакамлари томонидан назорат қилиб борилди.
Марафон натижаларига кўра:
3-ўринни Давлат хавфчилик хизмат Чегара қўшинлари “Ёш чегарачи” ҳарбий-академик лицей, 2-ўринни Фавқулодда вазиятлар вазирлиги “Темурбеклар мактаби”
1-ўринни Миллий гвардия “Темурбеклар мактаби” жамоалари қўлга киритишди. Ғолиблар ташкилотчилар томонидан медаль, диплом ва қимматбаҳо совғалар билан тақдирланди. Шунингдек оммавий югуриш баҳсларида ҳам номинациялар бўйича ғолиблар муносиб рағбатлантирилди.
Барчага ғолиблик сари курашчанлик руҳини бағишлаган тадбир Миллий гвардия ашула ва рақс ансамбли хонандалари куй қўшиқлари билан давом эттирилди.
