O‘zbekiston Respublikasi Jamoat xavfsizligi universiteti birinchi bosqich kursantlarining Vatanga qasamyodi hamda O‘zbekiston Respublikasi Milliy gvardiyasi xizmatiga kirish qasamyodiga bag‘ishlangan tantanali marosim bo‘lib o‘tdi.
Marosimda O‘zbekiston Respublikasi Milliy gvardiyasi qo‘mondoni, O‘zbekiston Respublikasi Oliy Majlisi Qonunchilik palatasi deputatlari, kuch tuzilmalari taʼlim muassasalarining rahbarlari, taniqli davlat va jamoat arboblari, kursantlarning oila aʼzolari hamda mehribonlik uylari tarbiyalanuvchilari ishtirok etdi.
Saf maydoniga tantanali marsh sadolari ostida Davlat hamda Milliy gvardiya jangovar bayroqlari tantanali ravishda olib kirildi.
Marosim avvalida so‘zga chiqqan universitet boshlig‘i, polkovnik M. Rustambayev qasamyod – har bir vatan himoyachisi uchun muqaddas ekanligi, qasamyodga sodiqlik – haqiqiy vatanparvarlarga xos muhim xususiyat sanalishini eʼtirof etdi.
Shundan so‘ng, kursantlar har bir vatan himoyachisi uchun muqaddas sanalgan, endilikda ular ham o‘z zimmasiga olayotgan masʼuliyatli va sharafli bo‘lgan burchni har qanday vaziyatda ado etishga tantanali qasamyod qabul qildi.
Qasamyoddan so‘ng, Milliy gvardiya qo‘mondoni, general-mayor R.Djurayev kursantlarni Milliy gvardiya safiga qabul qilinganligi bilan tabrikladi.
Shundan so‘ng tadbir qatnashchilariga Zahiriddin Muhammad Bobur obrazining ot ustida o‘z navkarlari bilan badiiy chiqishlari, Universitet kursantlaridan iborat guruhlar “Saf” tayyorgarligi va "Qo‘l jangi" bo‘yicha ko‘rgazmali chiqishlar namoyish etildi. Shuningdek, tadbirda O‘zbekiston Respublikasi Milliy gvardiyasining alohida harbiy namunali- ko‘rgazmali orkestrining chiqishlar namoyish etildi.
Jamoat xavfsizligi universitetiga o‘qishga qabul qilingan 1-bosqich kursantlarining qasamyodiga bag‘ishlangan tantanali marosimdan so‘ng, taniqli sanʼatkorlar va Universitet badiiy havaskorlik ansambli ishtirokida bayram konserti namoyish etildi.