“O‘zbekistonda konstitutsiyaviy kafolatlar: mutanosiblik, tenglik va adolat prinsiplari” mavzusiga bag‘ishlangan respublika ilmiy-amaliy konferensiyasi bo‘lib o‘tdi.
Milliy gvardiya Jamoat xavfsizligi universitetida “Davlat huquqiy fanlar va inson huquqlari” kafedrasi tomonidan “O‘zbekistonda konstitutsiyaviy kafolatlar: mutanosiblik, tenglik va adolat prinsiplari” mavzusiga bag‘ishlangan respublika ilmiy-amaliy konferensiyasi bo‘lib o‘tdi. Tadbir O‘zbekiston Respublikasi Konstitutsiyasining 33 yilligi munosabati bilan tashkil etildi.
Konferensiyada davlat tashkilotlari vakillari, sud-huquq tizimi mutaxassislari, oliy ta’lim muassasalari professor-o‘qituvchilari, huquqshunoslar hamda fuqarolik jamiyati institutlari vakillari ishtirok etdi.
Tadbir davomida ishtirokchilar Konstitutsiyada belgilangan mutanosiblik, tenglik va adolat prinsiplari amaliyotda qanday tatbiq etilayotgani, inson huquqlari kafolatlari va qonun ustuvorligini ta’minlash yo‘nalishida amalga oshirilayotgan islohotlar bo‘yicha fikr almashdilar. Muhokamalarda tenglikni ta’minlash, diskriminatsiyaning oldini olish, adolatli sud tizimini shakllantirish kabi dolzarb masalalar ham yoritildi.
Konferensiya yakunida ishtirokchilarga tashakkurnomalar va esdalik sovg‘alari topshirildi. Shuningdek, Konstitutsiyaning mazmun-mohiyatini keng targ‘ib qilish, aholining huquqiy madaniyatini oshirish hamda ilmiy-amaliy takliflarni davlat dasturlariga tatbiq etish bo‘yicha tavsiyalar ilgari surildi.
