“Ўзбекистонда конституциявий кафолатлар: мутаносиблик, тенглик ва адолат принциплари” мавзусига бағишланган республика илмий-амалий конференцияси бўлиб ўтди.
Миллий гвардия Жамоат хавфсизлиги университетида “Давлат ҳуқуқий фанлар ва инсон ҳуқуқлари” кафедраси томонидан “Ўзбекистонда конституциявий кафолатлар: мутаносиблик, тенглик ва адолат принциплари” мавзусига бағишланган республика илмий-амалий конференцияси бўлиб ўтди. Тадбир Ўзбекистон Республикаси Конституциясининг 33 йиллиги муносабати билан ташкил этилди.
Конференцияда давлат ташкилотлари вакиллари, суд-ҳуқуқ тизими мутахассислари, олий таълим муассасалари профессор-ўқитувчилари, ҳуқуқшунослар ҳамда фуқаролик жамияти институтлари вакиллари иштирок этди.
Тадбир давомида иштирокчилар Конституцияда белгиланган мутаносиблик, тенглик ва адолат принциплари амалиётда қандай татбиқ этилаётгани, инсон ҳуқуқлари кафолатлари ва қонун устуворлигини таъминлаш йўналишида амалга оширилаётган ислоҳотлар бўйича фикр алмашдилар. Муҳокамаларда тенгликни таъминлаш, дискриминациянинг олдини олиш, адолатли суд тизимини шакллантириш каби долзарб масалалар ҳам ёритилди.
Конференция якунида иштирокчиларга ташаккурномалар ва эсдалик совғалари топширилди. Шунингдек, Конституциянинг мазмун-моҳиятини кенг тарғиб қилиш, аҳолининг ҳуқуқий маданиятини ошириш ҳамда илмий-амалий таклифларни давлат дастурларига татбиқ этиш бўйича тавсиялар илгари сурилди.
