2023 yilning 11 sentyabr kuni O‘zbekiston Respublikasi Prezidentining «O‘zbekiston – 2030» strategiyasi to‘g‘risida»gi Farmoni qabul qilindi. Mazkur farmonning mazmuni bugunda vazirlik, tashkilot va idoralarda o‘rganilmoqda.
O‘zbekiston Respublikasi Milliy gvardiyasi tizimidagi harbiy xizmatchi, xodimlar va ishchi xizmatchilarga «O‘zbekiston – 2030» strategiyasi to‘g‘risida»gi Farmonning mazmun mohiyati mutaxassislar tomonidan seminarlar jarayonida yetkazilmoqda. Ana shunday tadbirlarning navbatdagisi Milliy gvardiya maʼnaviyat va maʼrifat markazi va poytaxtimizning Uchtepa tumanida joylashgan harbiy qismda “Yangi O‘zbekistonda inson huquq va erkinliklarini ishonchli himoya qilish davlat siyosatining bosh mezoni” mavzusida bo‘lib o‘tdi. Tadbirda Jamoat xavfsizligi universiteti tarixchi olimlari, taniqli jurnalist va siyosatshunoslar ishtirok etishib, mavzu borasida maʼruzalar qilishdi.
Notiqlar tomonidan strategiyada 5 ta ustuvor yo‘nalish bo‘yicha 100 ta muhim maqsad o‘z aksini topganligi aytib o‘tilib, strategiya o‘z ichiga barqaror iqtisodiy o‘sish orqali daromadi o‘rtachadan yuqori bo‘lgan davlatlar qatoridan o‘rin olish, aholi talablariga va xalqaro standartlarga to‘liq javob beradigan taʼlim, tibbiyot va ijtimoiy himoya tizimini tashkil qilish, aholi uchun qulay ekologik sharoitlarni yaratish, xalq xizmatidagi adolatli va zamonaviy davlatni barpo etish, mamlakatning suvereniteti va xavfsizligini kafolatli taʼminlash kabi asosiy g‘oyalarni o‘z ichiga olganligi batafsil tushuntirib o‘tildi.
