BOLAJONLAR UCHUN HARBIY QISMGA SAYOHAT
Yoshlarni harbiy-vatanparvarlik ruhidagi tarbiyasini yanada oshirish maqsadida joylarda bir qator tadbirlar amalga oshirilmoqda.
Xususan, Milliy gvardiya Farg‘ona viloyati bo‘yicha boshqarmasi rahbariyati tashabbusi bilan Qo‘qon shahrida joylashgan 12-sonli Mehribonlik uyi tarbiyalanuvchilari uchun harbiy qismga sayohat tashkil etildi.
Tadbir davomida harbiy xizmatchilar tomonidan ochiq osmon ostida o‘tkazilgan ot sporti bo‘yicha ko‘rgazmali mashg‘ulotlarda yoshlarga tulporga minish, erkin harakatlanish, mazkur jonivorlarning zotlari, ularni parvarish qilish haqida ma'lumotlar berildi. Shuningdek, otda to‘siqlar osha sakrash, bunda xavfsizlik qoidalarini yodda tutish tushuntirildi. Ushbu tadbirlar jarayonlarida yigit-qizlar yangiliklar bilan yaqindan tanishib, o‘zlari ham ot ustida sayr qilishdi.
Harbiy xizmatchilar o‘quvchilarni qiziqtirgan barcha savollarga birma-bir, sodda va ularga tushunarli tarzda javob berdilar.
