Davlatimiz rahbari raisligida Ulug‘ ayyom – Ramazon hayiti bayrami arafasida ehtiyojmand aholimizning ijtimoiy himoyasini yana-da kuchaytirish masalalari yuzasidan videoselektor yig‘ilishi bo‘lib o‘tmoqda. Yig‘ilishda keksa yoshdagi hamda ehtiyojmand aholini, shuningdek, Oilaviy bolalar uylarini qo‘llab quvvatlash masalalariga alohida eʼtibor qaratildi.
Mazkur yig‘ilishda oxirgi yillarda ota-ona qaramog‘idan mahrum bo‘lgan bolalar, boquvchisini yo‘qotgan xotin-qizlar, nogironligi bo‘lgan shaxslar, og‘ir kasallikka chalinganlarga g‘amxo‘rlik ko‘rsatish bo‘yicha yangi tizim yaratilgani taʼkidlandi.
Ushbu tizimga muvofiq, jumladan:
- “Mehribonlik uylari”dagi 1,5 mingga yaqin o‘g‘il-qizlar oilalarga olindi, 116 ta oilaviy uy tashkil qilinib, 700 ga yaqin farzandlar ota-ona bag‘rida voyaga yetishi uchun sharoit yaratildi.
Buning hisobiga, 10 ta “Mehribonlik uyi”, 4 ta “Bolalar shaharchasi” va 2 ta “Bolalar uylari” yopildi;
- o‘tgan yili 757 nafar bola uy-joy bilan taʼminlandi, 2022 yil yakuniga qadar yana 350 ta ajratiladi;
- davlat hisobidan 4 mingdan ziyod bolalarda murakkab operatsiyalar o‘tkazildi;
- o‘tgan yili 42 mingga yaqin nogironligi bo‘lgan shaxslarga olib berildi;
- o‘tgan yili eshitish qobiliyati zaif 555 nafar bola koxlear implant bilan taʼminlandi, joriy yilda yana 250 nafar bolaga shunday yordam ko‘rsatiladi;
- 4 ming nafar ko‘zi ojiz bolalarga Brayl alifbosi tarqatildi.
Shuningdek, Oilaviy bolalar uylarini qo‘llab-quvvatlash masalasi ko‘rib chiqildi.
Ularga byudjetdan mablag‘ ajratish tartibi soddalashtirilishi taʼkidlandi. Yaʼni, kundalik xarajatlarni qoplash uchun mablag‘ ota-onalarning shaxsiy plastik kartasiga o‘tkaziladi.
Shu bilan bir qatorda, Oilaviy bolalar uylarining kommunal to‘lovlari aholi uchun belgilangan tariflarda olinadi.
Bundan tashqari, yetim va ota-ona qaramog‘idan mahrum bo‘lgan talabalarga oziq-ovqat va kiyim-kechak xaridi uchun 10 million so‘mdan ajratish amaliyoti nodavlat oliygohlarda ham joriy etiladi.
Umuman, 376 ta mehribonlik, saxovat va muruvvat uylari, maxsus maktab-internatlarni taʼmirlash va jihozlash bo‘yicha 600 milliard so‘mlik alohida dastur qabul qilinadi.
