Farg‘ona shahridagi besh nafar Ikkinchi jahon urushi faxriylariga Prezident sovg‘alari topshirildi
Davlatimiz rahbarining “Ikkinchi jahon urushi qatnashchilarini rag‘batlantirish to‘g‘risida”gi Farmon ijrosini taʼminlash maqsadida mamlakatimizda bir qator islohotli ishlar amalga oshirilmoqda. Xususan, Farg‘ona viloyatidagi 5 nafar urush qatnashchilari va front orti ishtirokchilari holidan xabar olinib, ular ishtirokida maʼnaviy-maʼrifiy tadbirlar tashkillashtirildi.
Bugun ham keng jamoatchilik vakillari Ikkinchi jahon urushi qatnashchilarining xonadonlariga tashrif buyurdi. Urush faxriylarini taqdirlash marosimlarida shahar hokimligi vakillari, Milliy gvardiya, Mudofaa bo‘limi, Ichki ishlar organlar masʼullari, nuroniylar va yoshlar ishtirok etdi.
Tadbir davomida Prezidentimizning tabriknomasini o‘qib eshittirilib, urush qatnashchilariga 18 million so‘mdan pul mukofoti, ramziy belgi, esdalik sovg‘alari hamda oziq-ovqat mahsulotlari topshirildi.
Keksa-nuroniylar ularga qaratilayotgan eʼtibor va ko‘rsatilayotgan g‘amxo‘rlikdan mamnun bo‘lib, yurtimiz tinch, osmonimiz musaffo bo‘lishini tilab duo qildilar.
