Harbiy xizmatchi va xodimlar o‘rtasida shaxmat sporti bo‘yicha "Milliy gvardiya birinchiligi" musobaqasi o‘tkazildi
Davlatimiz rahbarining "Shaxmatni yana-da ommalashtirish va rivojlantirish bo‘yicha qo‘shimcha chora-tadbirlar to‘g‘risida"gi qarori ijrosini taʼminlash maqsadida Guliston shahrida joylashgan Yoshlar markazida Milliy gvardiya hududiy boshqarmalarida xizmat qilayotgan harbiy xizmatchi va xodimlar o‘rtasida mazkur sport bo‘yicha Milliy gvardiya birinchiligi o‘tkazildi.
Musobaqa davomida ishtirokchilar shaxmat sportining rapid yo‘nalishida o‘zaro kuch sinashishdi. Bellashuv qizg‘in va murosasiz bahslarga boy tarzda o‘tib, jarayonlar malakali hakamlar tomonidan adolatli baholab borildi.
Yakunda yakkalik va jamoa bahslarida g‘oliblar aniqlandi. Umumjamoa hisobida III o‘rin Qoraqalpog‘iston Respublikasi Milliy gvardiya boshqarmasi, II o‘rinni “Qo‘riqlash” bosh boshqarmasi, faxrli I o‘rinni Milliy gvardiya harbiy qismi jamoasiga nasib etdi.
G‘olib va sovrindorlar diplom, medal va esdalik sovg‘alari bilan taqdirlandi.
Shuni taʼkidlash joizki, bu kabi musobaqalar harbiy xizmatchi va xodimlarning bilimlarini oshirish bilan bir qatorda, o‘zaro jamoa bo‘lib bir maqsad sari harakat qilishlari uchun keng zamin yaratmoqda.
