Jamoat xavfsizligi universiteti yana bir katta sport bayramiga mezbonlik qilmoqda
Joriy yilning 5 noyabr kuni Jamoat xavfsizligi universitetida “Oʻzbekiston kasaba uyushmalari kuni” oldidan “Inson qadri uchun, el-yurt baxti uchun” shiori ostida Kuch tuzilmalari oliy oʻquv muassasalari kursant va talabalari oʻrtasidagi spartakiadasining tantanali ochilish marosimi boʻlib oʻtdi.
Jamoat xavfsizligi universiteti boshligʻi, polkovnik Mirzayusuf Rustambayev spartakiadani ochiq deb eʼlon qilgach, soʻz Oʻzbekiston davlat muassasalari va jamoat xizmati xodimlari kasaba uyushmasi Respublika kengashi raisi Anvarjon Abdumuxtorovga berildi. U tadbir tashkilotchilariga minnatdorchilik bildirib, ishtirokchilarga gʻalabalar tiladi. Shundan soʻng soʻzga chiqqanlar ham mazkur spartakiada anʼanaviy tus olishiga tilak bildirdilar. Jamoat xavfsizligi universiteti harbiy orkestri davraga yanada koʻtarinki ruh bagʻishladi.
Tantanali ochilish marosimidan soʻng, Jamoat xavfsizligi universitetining keng, yorugʻ sport zallari, maydonlari qizgʻin musobaqalar shukuhiga toʻldi. Ayniqsa, Oʻzbekiston Respublikasi Favqulodda vaziyatlar vazirligi akademiyasi, Amir Temur nomidagi Oʻzbekiston Respublikasi Davlat xavfsizlik xizmati akademiyasi, Oʻzbekiston Respublikasi Qurolli kuchlari akademiyasi, Oʻzbekiston Respublikasi Ichki ishlar vazirligi akademiyasi, Oʻzbekiston Respublikasi Bojxona qoʻmitasining bojxona instituti, Oʻzbekiston Respublikasi Jamoat xavfsizligi universiteti sport jamoalarining har bir chiqishini muxlislar katta olqish va hayajon bilan qutladilar.
Bu nufuzli sport bayrami yillar davomida anʼanaviy tarzda oʻtkazilib, yangi-yangi sport yulduzlarini kashf etishiga ishonamiz.
