Yangiliklar

Kamondan otish sport turi bo‘yicha joriy yilning 13-17 iyun kunlari Antalya shahrida bo‘lib o‘tgan Yakuniy Jahon kvalifikatsion turnirida Milliy terma jamoa aʼzosi Sadikov Amirxon turnirning barcha bahslarida raqiblarini katta farq bilan yutib, birinchi o‘rinni egalladi va oltin medal bilan Parij-2024 yozgi olimpiya o‘yinlariga yo‘llanmani qo‘lga kiritdi. Bu esa mohir kamonchimiz tomonidan qayt etilgan tarixiy natija bo‘ldi.
Eslatib o‘tamiz, Kamondan otish bo‘yicha O‘zbekiston terma jamoasi aʼzosi Ziyodaxon Abdusattorova ham Tailandda o‘tgan Parij-2024 litsenzion turnirida muvaffaqiyatli ishtirok etib, yurtimiz uchun tarixda mazkur sport turida ilk Olimpiada yo‘llanmasini taqdim qilgan edi.
Shu munosabat bilan bugun Milliy gvardiya qo‘mondoni, Kamondan otish federatsiyasi raisi R.Djurayev mamlakatimizda sport sohasida amalga oshirilayotgan islohotlar va uning rivojlanishiga munosib hissasini qo‘shib, sportning Kamondan otish sport turi bo‘yicha mintaqaviy va xalqaro turnirlarni tashkil etilishida jonbozlik ko‘rsatib kelayotgan sportchi va murabbiylar bilan uchrashuvi bo‘lib o‘tdi.
Uchrashuv davomida yuqori natijalarni qo‘lga kiritgan mohir merganlarimiz Sadikov Amirxon, Abdusattorova Ziyoda hamda xorijiy murabbiy Kim Myongsyon, murabbiylar Savinova Irina, Kurvyakov Anton, Aripova Gulnara, shu bilan bir qatorda terma jamoaga yaqindan psixologik ko‘mak berib kelayotgan mutaxasislar Akbarova Komola, Ribchenko Irina, Kim Yuliyalarga O‘zbekiston Respublikasi Milliy gvardiyasining III-darajali “Namunali xizmatlari uchun” ko‘krak nishoni, qo‘l soatlari va qimmatbaho esdalik sovg‘alar topshirildi.
Shuningdek, ushbu tadbirda Markaziy devon boshqarma boshliqlari, sohaning masʼul xodimlari hamda harbiy xizmatchi va xodimlari ham ishtirok etib, tarixiy natija bilan qutlashdi.
O‘z navbatida so‘z olgan sportchi va murabbiylar mazkur erishilayotgan yutuqlar zamirida davlatimiz Rahbari tomonidan qaratilayotgan eʼtibor hamda Kamondan otish federatsiyasida so‘nggi yillarda yaratilgan shart-sharoitlar muhim o‘rin tutayotganligini alohida tilga olib, chuqur minnatdorchilik bildirishdi.
Tadbir so‘ngida Kamondan otish bo‘yicha milliy terma jamoasi aʼzolari bilan kelgusidagi istiqbolli rejalar muhokama qilinib, Parij shahrida bo‘lib o‘tadigan Parij-2024 yozgi olimpiya o‘yinlariga bor kuch va g‘ayratni safarbar qilgan holda yuqori natijalarni qo‘lga kiritib, davlatimiz madhiyasini yangrashi hamda bayrog‘imizni sportchilar tomonidan yuqoriga ko‘tarilishi oliy maqsad etib belgilandi.