Milliy gvardiya saflarida bir yil mobaynida yigitlik burchini o‘tab bo‘lgan muddatli harbiy xizmatchilar tantanali ravishda o‘z yashash manzillariga kuzatib qo‘yildi.

Milliy gvardiya harbiy qismlarida xizmat olib borgan muddatli harbiy xizmatchilar jamoat tartibini saqlash va fuqarolar xavfsizligini taʼminlash borasida xizmat o‘tash bilan birga jismoniy tarbiya, jangovar va maʼnaviy – maʼrifiy tayyorgarlik mashg‘ulotlari bo‘yicha bilim olishib, harbiy-vatanparvarlik ruhida tarbiyalandilar. Milliy gvardiya markaziy devoni va harbiy qismlarida o‘tkazilgan tadbirlarda muddatli harbiy xizmatni namunali o‘tagan 350 nafar harbiy xizmatchilarning ota-onalariga Milliy gvardiya qo‘mondonligi nomidan tashakkurnomalar va test sinovlaridan muvaffaqiyatli o‘tgan 1350 nafar askarlarga O‘zbekiston Respublikasi oliy taʼlim muassasalariga o‘qishga kirishlari uchun tavsiyanomalar topshirildi. Bundan tashqari 750 nafariga esa ota onalariga minnatdorchilik xati taqdim etildi.

Shuningdek, Milliy gvardiya tizimida kadrlar tayyorlash hamda rezervini yaratish maqsadida o‘tkazilgan kasbiy saralashda muvaffaqiyatli ishtirok etgan muddatli harbiy xizmatchilar kontrakt bo‘yicha harbiy xizmatga va qo‘riqlash xizmatiga xodim sifatida qabul qilinadigan bo‘ldi. Shuningdek, muddatli harbiy xizmatni tamomlab o‘z hududlariga qaytgan yigitlarning bandligini taʼminlash maqsadida ham manzilli ishlar olib boriladi. Ular maktablarda qorovullik lavozimlariga qabul qilinishadi.

Milliy gvardiya saflarida xizmatni o‘tab qaytayotgan har tomonlama yetuk, jismonan sog‘lom bo‘lgan muddatli harbiy xizmatchilar o‘z hududlariga borganda albatta, ilg‘or sohalarning muhim vakillari bo‘lishadi. Toshkent janubiy temir yo‘l vokzalida xizmatdoshlari bilan xayrlashgan askarlar harbiy orkestr sadolari ostida tantanali ravishda o‘z viloyatlariga kuzatib qo‘yildi.