Bugun yigirmadan ortiq vazirlik va idoralar ishtirok etgan Respublika Maʼnaviyat va maʼrifat markazi tomonidan o‘tkazilgan maʼnaviy-maʼrifiy sohadagi «Eng namunali tuman va shahar» hamda «Eng namunali vazirlik va idora» tanlovlari g‘oliblarini tantanali taqdirlash marosimi bo‘lib o‘tdi.

Taʼkidlash joizki, bu kabi tanlovlar vazirlik va idoralarda Maʼnaviyat va maʼrifat kengashlari faoliyatini samarali yo‘lga qo‘yish va ularning faoliyat natijadorligini oshirishga eʼtibor qaratish, hududlarda maʼnaviy yangilanish, yangi maʼnaviy makonni yaratish, maʼrifatli jamiyat barpo etish borasida olib borilayotgan keng ko‘lamli ishlarni targ‘ib etish hamda jamiyatda ijtimoiy-maʼnaviy muhitni sog‘lomlashtirishda vazirlik va idoralar ishtirokini yana-da kuchaytirishga qaratilgan.

Qayd etilishicha, bu yil tanlov yangiligi sifatida 5 ta nominatsiya ham joriy etilgan. Xususan, «Davlat tilida ish yuritish bo‘yicha eng namunali vazirlik-idora» nominatsiyasi bo‘yicha Bandlik va mehnat munosabatlari vazirligi, «Eng faol kitobxon vazirlik-idora» nominatsiyasi bo‘yicha Kadastr agentligi, «Eng faol targ‘ibotchi vazirlik-idora» nominatsiyasi bo‘yicha Madaniyat vazirligi, «Eng yaxshi vazirlik-idora sayti» nominatsiyasi bo‘yicha Favqulodda vaziyatlar vazirligi, «OAV va ijtimoiy tarmoqlarda eng faol vazirlik-idora» nominatsiyasi bo‘yicha Maktabgacha taʼlim vazirligi taqdirlandi.

«Eng namunali vazirlik va idora» tanlovida Ichki ishlar vazirligi 1-o‘rin, Mudofaa vazirligi 2-o‘rin, Milliy gvardiya va “O‘zkimyosanoat” AJ 3-o‘rinni egalladi. Shuningdek, Davlat soliq qo‘mitasi 4-o‘rin, Iqtisodiy taraqqiyot va kambag‘allikni qisqartirish vazirligi 5-o‘ringa munosib topildi. Har ikki tanlovning mutlaq g‘oliblariga Prezident sovg‘asi – “Damas” avtomobili va 15 million so‘mlik kitoblar to‘plami taqdim etildi. 2-o‘rin egalariga – 40 million so‘m pul mukofoti va 12 million so‘mlik kitoblar to‘plami; 3-o‘rin sohiblariga – 25 million so‘m pul mukofoti va 8 million so‘mlik kitoblar to‘plami; 4-5-o‘rinlarga esa – 10 million so‘mlik pul mukofoti topshirildi.