O‘zbekiston Respublikasi Qurolli Kuchlari tashkil etilganligining 31 yilligini hamda Vatan himoyachilari kuni munosabati bilan Milliy gvardiya Maʼnaviyat va maʼrifat markazida “Milliy gvardiya va yoshlar” mavzusida uch avlod uchrashuvi bo‘lib o‘tdi. Unda Milliy gvardiya qo‘mondoni o‘rinbosari polkovnik S.Mamayusupov, Milliy gvardiya faxriysi, istefodagi polkovnik Sh.Usmonov va dzyudo, boks, og‘ir otletika sport turlari bo‘yich Olimpiada, Jahon va Osiyo g‘olib va sovrindorlari podpolkovnik R.Sobirov, kapitan X.Do‘stmatov, oddiy askar D.Yoqubov hamda katta leytenant R. Qodirovalar yoshlar bilan suhbat qurishdi. O‘quvchilar harbiy soha va sportda erishilayotgan yutuqlar zamiridagi mashaqqatli mehnat haqida ulardan qiziqarli maʼlumotlarni olishdi. Tadbir davomida mehmonlarga tashakkurnomalar topshirilib, ularning boy tajribasi yoshlarni vatanparvarlik ruhida kamol topishida beqiyos ekanligi taʼkidlandi. Uchrashuvga yosh isteʼdod sohiblari ham taklif etilganligi, ularning sahnadagi ko‘rgazmali chiqishlari barchaga xush kayfiyat bag‘ishladi. Vatanni madh etuvchi kuy-qo‘shiqlar esa o‘sib kelayotgan yosh avlod qalbida mard va jasurlik xislarini uyg‘otdi. Shuningdek, tadbirga Sirdaryo viloyati Baxt shahridagi Respublika o‘g‘il bolalar tarbiya muassasasidan tashrif buyurgan tarbiyalanuvchilar uchun markaz bo‘ylab sayohat tashkil etildi. Bundan tashqari ular poytaxtimiz markazida joylashgan “Prezident archasi”da ham bo‘lishib, taʼtil kunlarini maroqli o‘tkazishdi.