Konstitutsiyamizning 30 yilligi arafasida Milliy gvardiya Maʼnaviyat va maʼrifat markazining tantanali ochilish marosimi bo‘lib o‘tdi
Davlatmiz Rahbarining 2019 yil 7 fevraldagi “O‘zbekiston Respublikasi Milliy gvardiyasining maʼnaviy-maʼrifiy faoliyatini yana-da takomillashtirish chora-tadbirlari to‘g‘risida” gi PQ-4163-son Qarori asosida tashkil etilgan O‘zbekiston Respublikasi Milliy gvardiyasi Maʼnaviyat va maʼrifat markazining 8 dekabr O‘zbekiston Respublikasi Konstitutsiyasi kuni arafasida ochilish marosimi bo‘lib o‘tdi.
Mazkur tantanali tadbirda Prezident Administratsiyasi, Prezident maslahatchisi o‘rinbosari, Oliy Majlis va Xavfsizlik kengashi, Vazirlar Mahkamasi mutasaddi rahbarlari, Prezident ijod va ixtisoslashtirilgan maktablarni rivojlantirish agentligi, sanʼat va madaniyat arboblari,Toshkent shahar va Yunusobod tuman hokimligi, Respublika maʼnaviyat va maʼrifat markazi hamda Yoshlar ishlari agentligi vakillari, hamkor vazirlik va idoralar, shuningdek, Milliy gvardiya huzurida faoliyat olib borayotgan Bolalar psixologiyasi markazi psixologlari, Milliy gvardiya tizimidagi taʼlim muassasalari tinglovchilari, harbiy xizmatchi va xodimlar ishtirok etidi.
Maʼnaviyat va maʼrifat markazining tantanali ochilishi va Bosh Qomusimizning 30 yilligi munosabati bilan tashkillashtirilgan ushbu tadbirda Milliy gvardiya qo‘mondoni general-mayor R.Djurayev tashrif buyurganlarga qutlov nutqi bilan yuzlandi. Kirish so‘zida O‘zbekiston Respublikasi Konstitutsiyasi qabul qilingan kun munosabati bilan barchani samimiy muborakbod etdi.
Qomusimizning asosiy prinsiplari umuminsoniy qadriyatlarga asoslanishi va ularni hayotga tadbiq etish borasida davlatimiz rahbari boshchiligida katta qadamlar qo‘yilgani, ushbu jarayon bugungi kunda yangi bosqichga ko‘tarilganiga alohida urg‘u berildi.
Shu o‘rinda, hukumatimiz tomonidan bolalar va yoshlarga katta eʼtibor qaratilayotganligi bu yo‘nalishda ham yurtboshimiz tashabbusi bilan shahar va qishloqlarning har bir mahallasida yoshlarning o‘z yetakchisi faoliyati yo‘lga qo‘yilganligi muhim ahamiyat kasb etishi taʼkidlandi. Ushbu yetakchilarning 36 nafari aynan Milliy gvardiya vakillari ekanligi aytilib bu katta masʼuliyat yuklashi bilan birga bildirilgan ishonch ekanligi aytib o‘tildi.
Shuningdek, taʼlim muassasalarini deinstitutsionalizatsiya qilishda ham sezilarli natijalarga erishilgani, hattoki, bolalarni Oilaviy bolalar uylari bag‘riga, vasiylik yoki homiylikka topshirgach ham Milliy gvardiya tomonidan ushbu bolalarga mehr va eʼtibor berilishi davom ettirilayotgani yodga olindi.
Shu o‘rinda bolalar va tutingan ota-onalarga malakali psixologik yordam ko‘rsatish maqsadida, yaqinda Bolalar psixologiyasi markazi o‘z faoliyatini boshlagani va mazkur markazning birinchi qavatidan bolalar aeromodellashtirish, robototexnika, IT-texnologiyalari to‘garaklari bilan shug‘ullanishlari mumkin bo‘lgan Yoshlar innovatsion markazi o‘rin olganiga ham to‘xtalib o‘tildi.
Maʼnaviyat va maʼrifat markazi ham yuqorida taʼkidlangan fikrlarning mantiqiy davomi sifatida yoshlar va o‘smirlar uchun ham xizmat qilishi aytilib, til o‘rganish, Milliy raqs va sport mashg‘ulotlari bilan shug‘ullanishlari uchun barcha sharoitlar mavjudligi taʼkidlandi.
Shundan so‘ng, Milliy gvardiya qo‘mondoni buyrug‘i o‘qib eshittirilib unga ko‘ra sohaga yaqindan ko‘mak berib kelayotgan hamkor vazirlik va idoralarning bir qator mutasaddilari va fahriylar munosib taqdirlandilar. Shu bilan birga, Milliy gvardiyaning uch nafar harbiy xizmatchisiga navbatdagi “polkovnik” harbiy unvoni topshirilib, 10 nafar harbiy xizmatchi va xodimlar "O‘zbekiston Konstitutsiyasinig 30 yilligi" esdalik nishonlari hamda “To‘maris izdoshlari-2022” ko‘rik-tanlovida munosib ishtirok etgan 12 nafar ayol harbiy xizmatchilar “Maʼnaviyat aʼlochisi” ko‘krak nishonlari bilan taqdirlandilar. To‘rt nafar Milliy gvardiya harbiy xizmatchi va xodimlari "Aʼlo xizmatlari uchun" ko‘krak nishonlari, uch nafar harbiy xizmatchi va xodim, shuningdek, Yoshlar ishlari agentligi Toshkent shahar boshqarmasi boshlig‘i "O‘zbekiston Respublikasi Milliy gvardiyasining fidoyi xodimi" ko‘krak nishoni bilan taqdirlandi. Shu bilan birga, besh nafar tizim harbiy xizmatchi va xodimlariga III darajali “Namunali xizmatlari uchun” ko‘krak nishoni, uch nafar faxriy harbiy xizmatchiga esdalik qo‘l soatlari topshirildi.
Tashrif buyurgan mehmonlarning samimiy tilaklaridan so‘ng tantanali tadbir kuy va qo‘shiqlar sadosi ostida davom etib barchaga bayromona kayfiyat ulashdi.
