QO‘QON YOSHLARI SPORT BILAN
Kuni kecha Qo‘qon shahrida Farg‘ona viloyati bo‘yicha Milliy gvardiya boshqarmasi Qo‘qon shahar IIO FMB va prokuraturasi bilan hamkorlikda yoshlar o‘rtasida velomarafon tashkil etildi.
Shahar hokimligi tashabbusi bilan o‘tkazilgan “TechnoWays” texnologik rivojlanish marafoni doirasida 200 ga yaqin ishtirokchilar qatnashib, ular 8500 metrlik masofani bosib o‘tdilar.
Marafon davomida ishtirokchilarning xavfsizligi Milliy gvardiya harbiy xizmatchilari tomonidan taʼminlanib, tadbir so‘ngiga qadar nazoratda bo‘ldi.
Qo‘qon shahrining markaziy ko‘chalarini kezib o‘tgan velosipedlar kolonnasi, ishtirokchilarning mahorat bilan velosipedlarni boshqarishi musobaqaga muxlislik qilayotgan barcha kuzatuvchilarda katta taassurot qoldirdi.
Shuningdek, tadbir sog‘lom turmush tarzi, jismoniy tarbiya va sportni keng targ‘ib qilish bilan bir qatorda ishtirokchilarni Qo‘qon shahri bilan yaqindan tanishtirish, o‘zaro birodarlik rishtalarini bog‘lashdek ezgu maqsadlarga xizmat qildi.
