Respublikamiz boʻylab 9-may - Xotira va qadrlash kuni bayrami keng nishonlanayotgan ayni kunlarda Sirdaryo viloyatida Milliy gvardiya Ixtisoslashtirilgan oʻquv markazining ochilish marosimi boʻlib oʻtdi
Prezidentimiz, Qurolli Kuchlar Oliy Bosh Qoʻmondoni tomonidan Qurolli Kuchlarimizning jangovar shayligini taʼminlash, jangovar tayyorgarlik koʻrsatkichlarini yanada takomillashtirish borasida belgilab bergan ustuvor vazifalari hamda mazkur yoʻnalishlarda Milliy gvardiya faoliyatiga oid Farmon va Qarorlarda koʻrsatilgan talablar asosida Sirdaryo viloyatida Milliy gvardiya Ixtisoslashtirilgan oʻquv markazi yangidan qad koʻtarib, kuni-kecha ochilish marosimi oʻtkazildi.
Mazkur tantanali tadbir 9 may – Xotira va qadrlash kuni arafasida tashkillashtirilib, unda Milliy gvardiya qoʻmondoni general-mayor R.Djurayev, Oʻzbekiston Respublikasi Prezidenti huzuridagi Xavfsizlik kengashi kotibiyati vakili Q.Zoitov, Sirdaryo viloyati hokimi oʻrinbosari F.Raximov, Nuroniylar kengashi raisi U.Abdiyev, viloyat prokurori S.Ismatov, Ichki ishlar boshqarmasi boshligʻi F.Haydarov, Harbiy okrug qoʻmondonligidan M.Aglayev, Yoshlar ishlari agentligining viloyat boshqarmasi boshligʻi M.Sadullayev, Guliston shahar hamda Mirzobod tumani hokimiyati va huquq tartibot idoralari rahbarlari, shuningdek markazning professor-oʻqituvchilari hamda keng jamoatchilik ishtirok etishdi.
Tadbir davomida, Milliy gvardiya Ixtisoslashtirilgan oʻquv markazi Davlatimiz rahbarining 2018 yil 21 fevral kunidagi PF-5356-son Farmoniga asosan tashkil etilgani yodga olinib, Markaz nafaqat Milliy gvardiya balki Qurolli Kuchlar tarkibidagi maxsus boʻlinmalari boʻlgan Mudofaa vazirligi, Ichki ishlar vazirligi, Davlat xavfsizligi xizmati Chegara qoʻshinlari, Prezident Davlat xavfsizligi xizmatining harbiy xizmatchi va xodimlarini 23 ta yoʻnalishda qayta tayyorlab, malakasini oshirib kelayotganligi, xususan shu kunga qadar 11 mingga yaqin tinglovchilar oʻqitilgan boʻlib, oʻtgan 2024 yilning oʻzida 2 mingga yaqin, harbiy xizmatchi va xodimlarining malakasi oshirilgani va qayta tayyorlangani taʼkidlab oʻtildi.
Shuningdek, yangi faoliyatini boshlagan ushbu Markaz, Kuch tuzilmalarining hamkorligini yanada mustahkamlab, professional kadrlar tayyorlashni yangi bosqichga koʻtarish maqsadida oʻtgan yili Sirdaryo viloyatining Mirzaobod tumaniga koʻchirilib, oʻquv-moddiy bazasi takomillashtirilgan holda barcha kuch tuzilmalari va huquq tartibot idoralari harbiy xizmatchi va xodimlaridan iborat tinglovchilar uchun umumiy mashgʻulotlar va tayyorlov markazi boʻlish bilan birga, hamkorlikdagi oʻquv-taktik mashgʻulotlarini muntazam olib borishga moʻljallangan dala-poligoni sifatida, zamon talablariga mos ravishda barcha shart-sharoitlar yaratilganligi va kelgusida ham takomillashtirib borilishiga alohida urgʻu berildi.
Oʻz navbatida soʻzga chiqqan Nuroniylar kengashi raisi va Markaz boshligʻi tomonidan Davlatimiz rahbarining eʼtibori, “Xalq va armiya – bir tanu bir jon!” tamoyili asosida yaratib berayotgan keng imkoniyatlar tufayli Sirdaryo viloyatida yoshlarni vatanparvarlik ruhida tarbiyalashga xizmat qiladigan yana bir ajoyib maskanning faoliyati yoʻlga qoʻyilganidan xursand ekanliklari, bundan albatta unumli foydalanishlari toʻgʻrisida soʻz yuritilib oʻz minnatdorligini bildirishdi.
Rasmiy ochilish marosimidan soʻng mehmonlar, markazda yaratilgan shart-sharoitlar bilan yaqindan tanishdilar. Xususan barcha imkoniyatlarga ega tinglovchilar yotoqxonasi, oʻqituvchi va yoʻriqchilar uchun xizmat xonalari, talab darajasida jihozlangan oʻquv sinflari, kutubxona, oshxona, askarlar yotoqxonasi, ochiq va yopiq sport majmualari, yopiq turdagi 100 metrli zamonaviy jangovar tir, jangovar va maxsus tayyorgarlikning amaliy mashgʻulotlarini oʻtkazish uchun ochiq maydonda aholi yashash punktlari, oʻquv avtobusi, temir yoʻl vagoni va “Aerobus A-320” samolyoti va boshqa oʻquv obyektlarida olib borilayotgan hamkorlikdagi oʻquv mashgʻulotlar jarayonlari kuzatilib, harbiy xizmatchi va xodimlarning jangovar va maxsus tayyorgarlik koʻrsatkichlari yuqori darajada takomillashtirib borilayotganligining guvohi boʻlishdi.
Tadbir davomida Milliy gvardiya qoʻmondoni tomonidan, viloyat kuch tuzilmalarida safdoshlariga namuna boʻlib kelayotgan bir qator harbiy xizmatchi va xodimlar hamda Sirdaryo viloyatida oʻz xizmat burchini bajarish chogʻida qahramonlarcha halok boʻlgan harbiy xizmatchilarning oila aʼzolari, shuningdek, yaqindan hamkorlik qilib kelayotgan tashkilot vakillari munosib ragʻbatlantirildi.
