Joriy yilning 19 dekabr kuni olingan tezkor maʼlumotga koʻra, Milliy gvardiya Andijon viloyati boʻyicha boshqarmasi xodimlari tomonidan Marhamat tumanida istiqomat qiluvchi 37 yoshli SH.B.ning yashash xonadoni oʻrnatilgan tartibda xolislar ishtirokida koʻzdan kechirildi. Unda jami 220 dona "7 SHOS", 28 800 dona “Mikki maus”, 87 600 dona “Britanik” va 8 dona “Korolevskiy salyut” nomli taxminiy qiymati 37 000 000 soʻmlik pirotexnika vositalari borligi aniqlandi. 

Hozirda mazkur holat yuzasidan Milliy gvardiya Andijon viloyati boʻyicha boshqarmasi tomonidan tergovga qadar surishtiruv harakatlari olib borilmoqda.

Shu kabi tezkor tadbirlar Qashqadaryo viloyatida ham oʻtkazilib, Milliy gvardiya xodimlari tomonidan Qarshi shahrida yashovchi fuqaro P.N. tegishli 480 quti "Treniya", 2 790 kuti "Britanik" nomli taxminiy qiymati 50 million soʻmlik pirotexnika vositalarining noqonuniy aylanmasiga chek qoʻyildi.

Shuningdek, Koson tumanida oʻtkazilgan tadbirda 18 yoshli A.B. 119 quti “Treniya” nomli pirotexnika vositasining blogini 130 000 soʻmdan sotmoqchi boʻlib turgan vaqtida ushlandi.

Hozirda har ikki holat yuzasidan surishtiruv ishlari olib borilmoqda.

Bundan tashqari, Milliy gvardiya Jizzax viloyati boʻyicha boshqarmasi tomonidan oʻtkazilgan tezkor-tadbir davomida katta miqdorda tamaki mahsulotlari hamda pirotexnika vositalarining noqonuniy muomalasiga chek qoʻyildi.

Oʻtkazilgan tadbir davomida oldindan kuzatuvga olingan fuqaro B.Y. boshqaruvidagi “Nexia-2” rusumli avtomashinasi Jizzax shahar “Eski shahar dehqon bozori” oldidagi turargohga kelib toʻxtagan vaqtida ushlanib, tekshirilganda avtomashina saloni va yukxonasida bojxona nazoratini chetlab olib kirilgan 996 dona qutida aksiz markasiz turli nomdagi tamaki mahsulotlari hamda 79 quti “Treniya” nomli pirotexnika vositasi borligi aniqlandi.

Umumiy qiymati 20 million soʻmlik tamaki va pirotexnika vositalari boʻyicha birlamchi protsessual hujjatlar rasmiylashtirilib, holat yuzasidan vaqtincha saqlovga olindi.

Aniqlangan tamaki mahsulotlari rasmiylashtirilishi uchun tegishliligi boʻyicha viloyat Bojxona boshqarmasiga yuborildi.