SERJANTLAR - MILLIY ARMIYAMIZNING TAYANCHI VA SUYANCHI
Milliy gvardiya tizimida xizmat qilib kelayotgan serjantlarning kasbiy mahorati hamda bilim-koʻnikmalarini oshirish maqsadida har yili "Serjantlar forumi" oʻtkazilishi anʼanaga aylangan.
Milliy gvardiya qoʻmondoni oʻrinbosari polkovnik S.Mamayusupov raisligida boʻlib oʻtgan navbatdagi forumda, yurtimiz tinchligi va osoyishtaligini taʼminlashda serjantlar tarkibi, tizimning tayanchi hamda suyanchi ekanligi taʼkidlandi.
Mazkur forum videoselektor tarzida oʻtkazilib, unda sohaga oid mutasaddi rahbarlar, tizim faxriylari va serjantlar tarkibi ishtirok etishdi.
Tadbirda Milliy gvardiya tizimida serjantlar tarkibini tayyorgarligiga alohida eʼtibor qaratilayotganligi va har qanday murakkab vaziyatlarda jismoniy hamda ruhiy sinovlarga bardosh bera oladigan, nostandart holatlarda mustaqil qaror qabul qilib, yuklatilgan vazifalarni aʼlo darajada bajarishga qodir boʻlgan kichik komandirlarni shakllantirish uchun barcha sharoitlar mavjudligi aytib oʻtildi. Shuningdek, Qurolli Kuchlar tizimini modernizatsiya qilish, milliy armiyamizning professional tayyorgarligini yanada mustahkamlash boʻyicha belgilab berilgan bir qator chora-tadbir va aniq mexanizmlar asosida olib borilayotgan tizimli islohotlar aynan tizimdagi serjant va oddiy askarlarning har tomonlama yetuk oliy maʼlumotli ofitser kadr sifatida shakllantirishga qaratilayotganligiga alohida toʻxtalib oʻtildi.
Ayniqsa, tizimda gendir tenglik taʼminlangan holda, ayollarni rolini oshirish, ularning huquq va manfaatlarini himoya qilish, xizmatga qabul qilish borasida ham xotin-qizlarning koʻrsatkichini oshirish dolzarb masala ekanligi qayd etildi.
Shundan soʻng, Forum ochiq muloqot tarzida davom ettirildi. Unda Toshkent shahri, Qoraqalpogʻiston Respublikasi, Jizzax, Sirdaryo, Surxondaryo va boshqa hududiy boʻlinmalardan soʻzga chiqqan serjantlar tomonidan bugungi kunda harbiy xizmatchilarga hamda ularning oila aʼzolariga yaratilayotgan shart-sharoitlar alohida eʼtirof etilib, yaratib berilayotgan barcha imkoniyatlar mamnuniyat bilan tilga olindi. Ayniqsa, koʻp yillik tajribaga ega boʻlgan harbiy xizmatchilarning farzandlari uchun Oliy taʼlim muassasalariga oʻqishga kirish uchun berilayotgan imtiyozlar asosida yoshlar nufuzli taʼlim muassasalarida tahsil olayotganliklari yodga olindi.
Oʻz oʻrnida soʻzga chiqqan harbiy xizmatchilar, hozirgi kunda Milliy gvardiya qoʻmondonligi tomonidan serjantlarning jangovar, jismoniy va ruhiy tayyorgarligini oshirish borasida amalga oshirilayotgan tizimli ishlar, ular tomonidan Milliy gvardiya faoliyati bilan bogʻliq barcha vazifalarni aʼlo darajada bajarishga xizmat qilayotgani taʼkidlab oʻtildi.
Bugunda serjantlar nafaqat jismonan baquvvatligi, balki intellektual salohiyati, bir necha chet tillarini bilishi, erkin fikrlaydigan, ravon va mazmunli nutq qila olishlari bilan ajralib turadilar. Ushbu jihatlarni harbiylarimiz mart oyida Amerika Qoʻshma Shtatlari va Hindistonda oʻtkazilgan musobaqalarda amalda namoyon etib, birinchi oʻrinni egallaganliklari yana bir bor eʼtirof etildi.
Harbiy xizmatdagi faoliyatini sergak olib borishlari natijasida, fuqarolar xavfsizligi taʼminlanayotganligi hamda oʻzining fidokorona xizmatlari bilan safdoshlarga namuna boʻlayotgan bir guruh harbiy xizmatchilar munosib ragʻbatlantirildi.
Shuningdek, poytaxtimizdagi Anhor kanalida choʻkayotgan fuqaroning hayotini saqlab qolishda jonbozlik koʻrsatgan ikki nafar harbiy xizmatchilar alohida tilga olinib, ular Milliy gvardiya qoʻmondoni va Favqulodda vaziyatlar vazirining buyrugʻiga asosan esdalik sovgʻalari bilan taqdirlandilar.
