O‘zbekiston Respublikasi Milliy gvardiyasi va “Temurbek o‘g‘lonlari” nodavlat taʼlim muassasasi o‘rtasida o‘zaro hamkorlik to‘g‘risidagi kelishuv imzolandi.
Hamkorlikdan ko‘zlangan asosiy maqsad “Temurbek o‘g‘lonlari” nodavlat taʼlim muassasasi o‘quvchilarining vatanparvarlik, Vatanga sodiqlik, fidoyilik tuyg‘ularini shakllantirish va rivojlantirish, maʼnaviy-axloqiy sifatlarini yuksaltirish, ishchanlik, ijodiy faollik qobiliyatlarini, bilim olishga bo‘lgan ongli munosabatlarini shakllantirish, aqliy va jismoniy qobiliyatlarini rivojlantirish, shuningdek, Milliy gvardiya saflarida xizmat qilishga qiziqtirish va ularda milliy armiyamizga bo‘lgan hurmatni oshirishdan iborat. Ushbu kelishuvga asosan Milliy gvardiya “Temurbek o‘g‘lonlari” NTMning chaqiruvga qadar boshlang‘ich tayyorgarlik sinfini kerakli anjomlar, o‘quv-uslubiy qo‘llanmalar bilan jihozlashga va maxsus kiyim-bosh dizaynini tayyorlashga ko‘maklashadi. O‘quvchilarni harbiy kasbga qiziqtirish bo‘yicha Milliy gvardiyada bo‘lib o‘tadigan harbiy vatanparvarlikka yo‘naltirilgan tadbirlarda ishtirok etishlarini taʼminlaydi. Boshlang‘ich harbiy tayyorgarlik darajalarini kuchaytirish va Milliy gvardiya to‘g‘risidagi bilimlarini oshirish bo‘yicha kerakli sharoitlar yaratiladi. Shu bilan bir qatorda muassasa o‘quvchilari uchun tizimga qarashli taʼlim muassasalari o‘rtasida o‘tkaziladigan fan olimpiadalari va sport musobaqalarida qatnashish imkoniyatlari yaratiladi. Kelgusida amalga oshirilishi rejalashtirilgan ishlar albatta Milliy gvardiya tarkibini bilimli, erkin fikrlaydigan, aqlan va jismonan yetuk kadrlar zahirasi bilan boyitishda o‘z samarasini beradi.
