Maktablar eshigi bemaqsad yurganlar uchun yopiq!
Joriy yilning 6 mart kuni soat 16:10 larda Qo‘qon shahrida joylashgan 4-sonli maktabda yangi tizimdagi qorovullik xizmatini olib borayotgan xodim tomonidan, ushbu maktab atrofida maqsadsiz yurgan va maktab hududiga kirmoqchi bo‘lgan to‘rt nafar begona shaxs to‘xtatilgan.
Qo‘riqlash bo‘limi xodimi tashvish tugmasi orqali qo‘riqlash bo‘limiga xabar berish bilan birga, ulardan nima maqsadda kelganliklarini so‘rab, maktabga begonalar kirishi mumkin emasligini va joriy qilingan yangi tartib-qoidalar to‘g‘risida tushuntirishga harakat qilganida, ular tushunishni istamasdan aksincha qorovul xodimining qonuniy talablarini bajarmasdan, o‘zlarining nojo‘ya hatti-harakatlari bilan qo‘pollik qilishga o‘tishgan.
Shu vaqtda chaqiruvga asosan yetib kelgan qo‘riqlash tezkor guruhi xodimlari ularning hatti-harakatlarini cheklab, holatga oydinlik kiritish uchun maktab hududidan olib ketishgan.
Milliy gvardiya masʼul xodimlari tomonidan olib borilgan dastlabki surishtiruv ishlari davomida ular Qo‘qon shahrida tug‘ilgan fuqarolar, 19 yoshli M. Ya., muqaddam O‘zbekiston Respublikasi Jinoyat kodeksining 109-moddasi ("qasddan yengil tan jarohati yetkazish") bo‘yicha sudlangan, 22 yoshli K. M., muqaddam O‘zbekiston Respublikasi Jinoyat kodeksining 104-moddasi ("qasddan og‘ir tan jarohati yetkazish") bo‘yicha sudlangan, 16 yoshli T. U., muqaddam uning ota-onasiga nisbatan O‘zbekiston respublikasining Maʼmuriy javobgarlik to‘g‘risidagi kodeksining 47-moddasi bilan (bolalarni tarbiyalash va ularga taʼlim berish borasidagi majburiyatlarni bajarmaslik) javobgarlik belgilangan, va 18 yoshli R. R., mazkur maktabning sobiq o‘quvchisi ekanligi maʼlum bo‘lgan.
Ushbu fuqarolarning hatti-harakatlarida O‘zR MJtKning 183, 194-1, 195-1 moddalarida ko‘rsatilgan huquqbuzarlik alomatlari mavjudligi sababli ularga nisbatan tegishli tartibda maʼmuriy bayonnoma rasmiylashtirilgan.
Hozirda to‘plangan xujjatlar, Sud organlariga yuborish choralari ko‘rilmoqda.
