Poytaxtimizning Yakkasaroy tumanida yo‘l talashib janjallashgan haydovchining avtomashinasida psixotrop dori vositalari borligi aniqlandi
Joriy yilning 23-mart kuni Toshkent shahar Yakkasaroy va Sergeli tumanlarini bog‘lovchi yangi qurilayotgan ko‘prik hududida jamoat tartibini saqlashga masʼul Milliy gvardiya xodimlari xizmat vazifasini bajarayotgan vaqtda, soat 16.00 lar atrofida ko‘prik tagidagi kichik xalqa yo‘lida “Spark” va “Lacetti” rusumli avtomashinalari haydovchilari o‘rtasida yo‘l talashish oqibatida kelishmovchilik yuzaga kelib janjallashayotganliklarini ko‘rib qolishgan.
Milliy gvardiya xodimlari PPXga xabar qilgan holda voqea joyiga yetib borib fuqarolarni tinchlantirish choralarini ko‘rishgan. Shu paytda PPX xodimlarini uzoqdan kelayotganini ko‘rgan “Spark” rusumli avtomashina haydovchisi mashinasining old qismidan o‘ziga tegishli bo‘lgan buyumlarni olib orqa yuk xonasiga joylashtirgan holda voqea joyidan ketishga va yashirinishga uringan.
Chaqiruvga asosan yetib kelgan PPX va Milliy gvardiya xodimlari tomonidan ushbu avtomashina to‘xtatilib ko‘zdan kechirilganda avtomashina orqa o‘rindig‘idan qora paketga o‘ralgan 10 dona “Zardex” hamda 10 ta qutida “Regapen” jami 154 dona oq va qizil rangli psixotrop moddalari mavjudligi aniqlangan.
Yakkasaroy tumani IIO xodimlari tomonidan olib borilgan dastlabki surishtiruv ishlari davomida “Spark” rusumli avtomashina haydovchisi fuqaro X.O. ekanligi aniqlangan. Hozirda holat yuzasidan surishtiruv ishlari davom ettirilmoqda.
