Vatan – ulug‘, burch - muqaddas
Kuni kecha Milliy gvardiya Toshkent “Temurbeklar maktabi” harbiy-akademik litseyida yoshlarni vatanparvarlik ruhida tarbiyalash samaradorligini oshirish maqsadida “Vatan – ulug‘, burch - muqaddas ” shiori ostida “Uch avlod uchrashuvi” tadbiri bo‘lib o‘tdi.
Uchrashuvga Milliy gvardiya Temurbeklar maktabining ilk bitiruvchilari bo‘lgan O‘zbekiston Respublikasi Oliy majlisi Qonunchilik palatasi deputati, Milliy gvardiyasi faxriylar markaziy kengashi aʼzolari hamda Milliy gvardiya Markaziy devoni mutasaddi vakillari tashrif buyurishdi.
Ochiq muloqot tarzida o‘tkazilgan uchrashuvda faxriy ustozlar yoshlarni milliy g‘oya va Vatanga sadoqat ruhida tarbiyalash, ularning qalbi va ongiga Vatan himoyasi sharafli va muqaddas burch ekanini chuqur singdirish, qadimiy tariximiz va madaniyatimiz, jonajon Vatanimizning mustaqilligi va ravnaqi yo‘lida fidokorona kurashgan milliy qahramonlarimiz bilan faxrlanish, ularga munosib bo‘lish tuyg‘usini shakllantirish, milliy armiyamizning qudrati va salohiyatiga bo‘lgan ishonchni kuchaytirish borasida o‘zlarining tajribalaridan va uzoq yillar mobaynida erishgan bilim va ko‘nikmalari haqida o‘rtoqlashdilar.
O‘zaro erkin va ochiq muloqot tarzida kechgan mazkur tadbirda o‘quvchilar o‘z fikrlari bilan o‘rtoqlashib, uchrashuv qizg‘in muhokamalarga aylandi.
Shuningdek, tadbir davomida Milliy gvardiya Temurbeklar maktabining iqtidorli o‘quvchi yoshlari o‘zlarining diltortar kuylari orqali barcha tadbir ishtirokchilariga o‘zgacha ko‘tarinki kayfiyat ulashishdi. Tadbir yakunida yoshlarni vatanparvarlik ruhida tarbiyalashda jonbozlik ko‘rsatib kelayotgan faxriy ustozlar tashakkurnomalar bilan munosib taqdirlandilar.
Haqiqatdan ham, vatanparvarlik tuyg‘usini o‘sib kelayotgan yosh avlodlarimizga chuqur singdirish har tomonlama, ham jismoniy, ham maʼnaviy jihatdan loyiq bo‘lishlikni yaxshi anglatadi. Kelgusida ana shu sifat va hislatlarni egallashga doimo harakat qiladilar. Kelajak avlodlarimiz yurt himoyasi naqadar ulkan vazifamiz ekanini qalbdan his qiladilar va bunga qattiq bel bog‘lagan vatanparvarlar bo‘lib kamol topadilar.
