Yoshlarning yozgi taʼtil kunlari mazmunli o‘tmoqda
Bugun O‘zbekiston Respublikasi Milliy gvardiyasi Moddiy-texnik taʼminot markaziy bazasida “Yoshlar oyligi” doirasida ochiq eshiklar kuni o‘tkazildi.
“Armiya-yoshlar nigohida” mavzusida bo‘lib o‘tgan ochiq eshiklar kuni munosabati bilan harbiy qism 200 nafarga yaqin o‘quvchi-yoshlarni o‘z bag‘riga chorladi.
Mazkur tadbir Chilonzor tumani hokimligi, tuman Yoshlar ishlari agentligi, Xalq taʼlimi hamda Yoshlar ittifoqi tuman bo‘limlari va Toshkent shahri bo‘yicha Milliy gvardiya boshqarmasi hamkorligida tashkil etildi.
Unda tumanning umumtaʼlim maktabi o‘quvchilari, akademik-litsey bitiruvchi yoshlari hamda “Samo” yoshlar ijod markazi aʼzolari va shuningdek mutasaddi tashkilot vakillari ishtirok etdi.
Tadbir boshida so‘zga chiqqanlar “Yoshlar oyligi” doirasida o‘tkazilayotgan bu kabi tadbirlar yoshlarimizga harbiy-vatanparvarlik ruhini yana-da to‘laroq singdirishga hamda ularning maʼnaviyatini yuksaltirishga qaratilganligini alohida taʼkidlab o‘tishdi.
Shuningdek, o‘z xizmat faoliyatini olib borish bilan birga sportning turli yo‘nalishlarida Jahon va Osiyo chempionligiga sazovor bo‘lgan ayol harbiy xizmatchilar ham yoshlarga maqsad sari intilishda o‘zining kerakli tavsiyalarini berdi.
Shundan so‘ng, “Samo” yoshlar ijod markazi tomonidan tayyorlangan konsert dasturiga navbat berildi. Markazning isteʼdodli ijodkorlarining Vatan haqida kuylagan qo‘shiqlari, ayniqsa, kichik yoshdagi bolajonlarning ijrosi tadbir ishtirokchilarida iliq taassurotlar qoldirdi. Taʼkidlash joizki, eng faol tadbir qatnashuvchilarining mutasaddilar tomonidan rag‘batlantirilishi ham ularning kelgusidagi ijodiy faoliyatini yana-da rivojlantirishga turtki bo‘ladi.
Musiqiy chiqishlardan so‘ng, tadbir ishtirokchilariga harbiy xizmatchilar tomonidan harbiy texnikalar hamda qurol aslahalar ko‘rgazmasi tashkil etildi. Unda o‘quvchi-yoshlar mazkur mavzu bo‘yicha o‘zlarini qiziqtirgan barcha savollariga javob olishdi. Harbiy qismga uyushtirilgan sayohat davomida bo‘lsa muddatli harbiy xizmatchilarga yaratilgan sharoit va imkoniyatlar bilan yaqindan tanishishdi.
Tadbir so‘nggida, yoshlarni jismoniy tarbiya va sportga keng jalb etish maqsadida sportning stol tennisi, shaxmat-shashka turlari hamda milliy o‘yinlarimizdan arqon tortish bo‘yicha o‘zaro bellashuvlar tashkil qilindi.
O‘ylaymizki, bugungi tadbir o‘quvchi-yoshlarning yozgi taʼtil davridagi vaqtlarini mazmunli o‘tishiga hamda beshta tashabbus yo‘nalishi bo‘yicha ularning qiziqishi yana-da ortishiga o‘z hissasini qo‘shadi.
