Milliy gvardiya Maʼnaviyat va maʼrifat markazida tizimdagi harbiy xizmatchi va xodimlar hamda ishchi xizmatchilar o‘rtasida “Eng yaxshi harbiy qo‘shiq ijrochisi” tanlovining respublika bosqichi o‘tkazildi
Mazkur tanlov harbiy-vatanparvarlik, ona Vatanga muhabbat va sadoqat, intellektual va ijodiy salohiyatni yana-da rivojlantirish maqsadida harbiy xizmatchilar, xodimlar va ishchi xizmatchilar o‘rtasida o‘tkazildi. Hududiy bosqichlarda g‘olib bo‘lgan 14 nafar ishtirokchi respublika bosqichiga yetib kelishdi. Ular ona-vatanni madh etuvchi hamda harbiylar to‘g‘risidagi qo‘shiqlarini tanlovda ijro etishib, o‘zaro ijodiy bellashishdi. Albatta har bir ijroning o‘ziga yarasha yutuq va kamchiliklari mavjud. Bularga esa Respublika maʼnaviyat va maʼrifat markazi, O‘zbekiston yozuvchilar uyushmasi, O‘zbekiston Bastakorlar uyushmasi vakillari, shoir va kompozitorlaridan tashkil topgan hakamlar hayʼati tomonidan baho berildi.
Ijrochilar kundalik xizmatlaridan tashqari ijod bilan shug‘ullanib, sanʼatga oshno bo‘lganligi, kuylagan ashulalarining dilga yaqinligi bilan tomoshabinlarda katta taʼsirot qoldirdi. Tadbir so‘ngida g‘olib va sovrindorlar aniqlanib, munosib ravishda rag‘batlantirildi.
Shuni taʼkidlab o‘tishimiz kerakki, mazkur tanlovda g‘olib bo‘lgan ishtirokchilar kelgusida Qurolli kuchlar tuzilmalari o‘rtasida bo‘lib o‘tadigan ko‘rik-tanlovlarda qatnashishadi.
