O‘zbekiston Respublikasi Qurolli Kuchlarining «Maʼnaviy-maʼrifiy ishlar aʼlochisi» ko‘krak nishonlari o‘z egalariga topshirildi
Bugun Milliy gvardiya Toshkent shahar Qo‘riqlash bosh boshqarmasida tizim harbiy xizmatchi va xodimlari, taʼlim muassasalari o‘quvchilari, kursantlar, Mehribonlik uyi tarbiyalanuvchilari ishtirokida tantanali tadbir bo‘lib o‘tdi.
Shuningdek, marosimda Milliy gvardiya qo‘mondonining o‘rinbosari polkovnik S. Mamayusupov, Respublika Maʼnaviyat va maʼrifat markazi “Maʼnaviyat” targ‘ibotchilar jamiyati aʼzosi, falsafa fanlari doktori J.Shermuxammedova hamda Oliy Majlis Qonunchilik palatasi deputati M. Valiyev va - Madaniyat vazirligi Konsert-tomosha faoliyatini rivojlantirish bo‘limi boshlig‘i F.Batirovlar ishtirok etdi.
Dastavval davlat madhiyasi yuksak faxr bilan ijro etildi va shundan so‘ng, Milliy gvardiya qo‘mondonining tarbiyaviy ishlar, kadrlar va yoshlar masalalari bo‘yicha o‘rinbosari nutq so‘zladi.
U o‘z nutqida davlatimiz Rahbarining “Agar jamiyat hayotining tanasi iqtisodiyot bo‘lsa, uning joni va ruhi maʼnaviyatdir” so‘zlari dasturi amal sifatida qabul qilinib, tizimda maʼnaviy-maʼrifiy ishlar samaradorligini oshirish, yoshlarni yuksak maʼnaviyat sohibi hamda ularni harbiy vatanparvarlik ruhida tarbiyalashga alohida eʼtibor qaratilayotganligiga urg‘u berdi.
Shundan so‘ng, qo‘mondon o‘rinbosari tomonidan Qurolli Kuchlar tizimida maʼnaviy-maʼrifiy ishlar samaradorligini oshirishga munosib hissa qo‘shgan harbiy xizmatchi va xodimlarni rag‘batlantirish maqsadida taʼsis etilgan O‘zbekiston Respublikasi Qurolli Kuchlarining «Maʼnaviy-maʼrifiy ishlar aʼlochisi» ko‘krak nishonlari tantanali ravishda o‘z egalariga topshirildi.
Shu bilan birga, armiya va xalq birligini taʼminlashda faol hamkorlik qilgan davlat tashkilotlari vakillari, xususan, Oila va xotin-qizlar qo‘mitasi, Alisher Navoiy Milliy kutubxonasi, Madaniyat vazirligi, Guliston Davlat universitetining masʼul xodimlari ham tadbirda munosib taqdirlandi.
Ishonamizki, maʼnaviyat sohasida amalga oshirilayotgan ezgu saʼy-harakatlar kelgusida harbiy xizmatchi va xodimlar, ayniqsa, yoshlar bilan o‘tkaziladigan maʼnaviy-maʼrifiy ishlar samarasi va taʼsirchanligini oshirishga hamda ularni yuksak maʼnaviyatli vatanparvar xodim sifatida tarbiyalashga xizmat qiladi.
