O‘zbekiston Respublikasi Milliy gvardiyasi Toshkent "Temurbeklar maktabi" va Harbiy-musiqa akademik litseyi o‘quvchilarining tantanali bitiruv marosimi bo‘lib o‘tdi.
Mazkur tadbirda O‘zbekiston Respublikasi Milliy gvardiyasi qo‘mondoni o‘rinbosari polkovnik S.Mamayusupov, O‘zbekiston Respublikasi Faxriylar kengashi raisi Q.Aminjonov, Vazirlar Mahkamasi bosh mutaxassisi U.Yakubov, faxriylar, ota-onalar, maktab pedagogik jamoasi va harbiy xizmatchilar ishtirok etdi.
Tadbirda so‘z olganlar o‘tgan qisqa davrda, Milliy gvardiya tizimidagi uzluksiz taʼlimni rivojlantirish, oliy va o‘rta maxsus taʼlim sifatini yana-da yaxshilash borasida keng qamrovli ishlar amalga oshirilayotgani va buning amaliy natijasini "Temurbeklar maktabi" va Harbiy musiqa akademik litseyi misolida ham ko‘rish mumkinligini taʼkidlashdi.
Shundan so‘ng o‘quvchilarga taʼlim muassasalarini muvaffaqiyatli tamomlaganliklari uchun tantanali ravishda diplomlar topshirildi.
Shuni alohida taʼkidlash joizki, Toshkent "Temurbeklar maktabi" bitiruvchi o‘quvchilarining oliy taʼlim muassasalariga o‘qishga kirish ko‘rsatkichi bo‘yicha so‘nggi yillarda 97.2 foizni tashkil etib respublikamizda barcha harbiy akademik litseylari orasida birinchi o‘rinni egallab kelmoqda. Shu bilan birga Milliy gvardiya Harbiy musiqa akademik litseyi o‘quvchilari ham respublika miqyosidagi "Sanʼat g‘unchalari", Braziliya, Italiya, Ozarbayjon, Rossiya, Ruminiya, Qozog‘iston kabi davlatlarda o‘tkazilgan xalqaro darajadagi nufuzli tanlovlarda g‘oliblikni qo‘lga kiritib, laureatlik unvonlariga sazovor bo‘ldilar. Bundan tashqari o‘quvchilar sportda ham qator yutuqlarni qo‘lga kiritishib ulgurishgan. Jumladan ular Markaziy Osiyo va O‘zbekiston chempionatlarida 6 ta oltin, 4 kumush, 6 ta bronza medallariga sazovor bo‘lishgan.
Eslatib o‘tamiz, Milliy gvardiya "Temurbeklar maktabi" va Harbiy musiqa akademik litseyini tamomlagan o‘quvchilarga kelajakda harbiy oliy o‘quv yurtlariga o‘qishga kirish uchun 30 foiz, boshqa taʼlim muassasalariga o‘qishga kirish uchun 15 foizli imtiyoz beriladi.
Har ikkala taʼlim muassasalari bitiruvchilariga kelgusi o‘qishlarida omad va zafarlar tilaymiz.
