Xalq xotirasi deganda kishi koʻz oʻngidan Vatan ibtidosidan buguniga qadar shu yurt, shu xalq deb kurashgan, kuch-qudrati, aql-zakovatini ayamagan, kerak boʻlsa, shu yoʻlda jon fido qilgan ne-ne buyuk zotlar bir-bir oʻtadi. 9-may – Xotira va qadrlash kuni umumxalq bayrami - bu shunchaki bayram emas, unda milliy xususiyat va yoshlarni maʼnaviy-axloqiy jihatdan tarbiyalashga hissa qoʻshadigan qadriyatlar mujassamdir.
9-may – Xotira va qadrlash kuni va Ikkinchi jahon urushida qozonilgan gʻalabaning 80 yilligi munosabati bilan Prezidentimiz Farmoni bilan urush qatnashchilari va nogironlarining har biriga 10 ming AQSH dollari hamda ularga tenglashtirilgan shaxslarga 25 million soʻm miqdoridagi pul mukofoti va tabriklarini tantanali ravishda topshirish maqsadida Milliy gvardiya qoʻmondoni general-mayor R.Djurayev Sergeli tumani hokimi Elbek Shukurov hamda sohaga oid mutasaddi rahbarlar poytaxtimizning Sergeli tumanida istiqomat qiluvchi Ikkinchi jahon urushi qatnashchisi boʻlgan 86 yoshli Malseva Svetlana Petrovnaning xonadoniga tashrif buyurishib, sana munosabati bilan yoʻllangan Prezident tabrigi oʻqib eshittirilgan holda pul mukofotlari va esdalik sovgʻalari tantanali ravishda topshirildi.
Shuningdek, Milliy gvardiya qoʻmondoni oʻrinbosari polkovnik S.Mamayusupov, harbiy xizmatchilar, tuman hokimligi vakillari ushbu tumanda istiqomat qiluvchi 88 yoshni qarshi olgan Ananeva Nina Antonovnaning holidan xabar olishib, Prezidentimiz tabrigi va pul mukofotlarini yetkazishdi. Albatta, ularga qancha ehtirom va eʼzoz koʻrsatsak shuncha kam, ularning qahramonligi, jasorati barchamizga namunadir.
Ana shunday Ikkinchi jahon urushi qatnashchilaridan yana biri 1926 yilda tugʻilgan Ikkinchi jahon urushi qatnashchisi 99 yoshni qarshi olgan Kolominseva Antonina Vasilevna, bugunda poytaxtimizning Chilonzor tumanida istiqomat qiladi. Onaxon jangohlarda hamshira boʻlib xizmat qilib, koʻplab urush qatnashchilariga tibbiy yordam koʻrsatgan. Antonina Vasilevna nafaqaga chiqgunga qadar 65 yil davomida tibbiyot xodimi sifatida faoliyat yurib, bemorlarga shifo ulashgan. Ularni yoʻqlash va bayram kayfiyatini xonadoniga olib kirish maqsadida Milliy gvardiya qoʻmondoni oʻrinbosari polkovnik A.Sormonkulov Chilonzor tumani hokimi S.Xolxoʻjayev, tuman mudofaa ishlari boʻlimi, gvardiyachilar, kursant va oʻquvchilar hamda tuman faollari bilan birgalikda Ikkinchi jahon urushi qatnashchisining uyiga tashrif buyurishdi.
Uchrashuv chogʻida Prezidentimiz tabrigi oʻqib eshittirildi. Shuningdek, urush fahriysi yoshlar bilan qizgʻin suhbat qurib, yaxshi taʼlim olish va Vatanga sadoqat bilan xizmat qilish kerakligini taʼkidladi. Yoshlar ham oʻz navbatida ijod namunalaridan yod olishib, tadbirga koʻtarinkilik baxshida etishdi.
Milliy gvardiya harbiy orkestri, Jamoat xavfsizligi universiteti kursantlari, “Temurbeklar maktabi” va Harbiy musiqa akademik litseyi oʻquvchilari onaxon istiqomat qiladigan koʻp qavatli turar joy binosi oldida saf tortishib bayram kayfiyatini ulashishdi. Bir soʻz bilan aytganda urush faxriylarining jasoratlari, koʻrsatgan qahramonliklari unutilmaydi. Ular oʻchmas mayoqdek, har doim qalbimizda mangu yashashadi.