14 yanvar-Vatan himoyachilari kuni munosabati bilan Milliy gvardiya tizimidagi harbiy qism va taʼlim muassasalarida Maʼnaviyat va maʼrifat markazlari foydalanishga topshirildi
So‘nggi yillarda Respublikamizda maʼnaviy-maʼrifiy sohalarda katta ishlar amalga oshirilmoqda. Buning natijasi o‘laroq joylarda maʼnaviyat va maʼrifat markazlari tashkil etilib, ularda yoshlar uchun bir qator to‘garaklar faoliyati yo‘lga qo‘yilib, milliy qadriyatlarimiz, urf-odat va sanʼatni, xalq og‘zaki ijodini o‘rganishga sharoitlar yaratilmoqda.
Xususan, 2023 yil 22 dekabr kuni davlatimiz rahbari raisligida o‘tkazilgan Respublika Maʼnaviyat va maʼrifat kengashining kengaytirilgan yig‘ilishida joriy yilda amalga oshirilgan ishlar tahlil qilinib, mazkur yo‘nalishda rejalashtirilgan ustuvor masalalar muhokama qilindi. Shuningdek, Maʼnaviyat-maʼrifat sohasida erishilgan yutuqlar alohida eʼtirof etildi.
Milliy gvardiya tizimida ham bugungi kunda maʼnaviy-maʼrifiy ishlar samaradorligiga alohida eʼtibor qaratib kelinayotganligi fikrimiz dalilidir. Harbiy xizmatchilar va ularning oila aʼzolari, kursant va o‘quvchilarning har tomonlama bilimli, maʼnaviy yetuk bo‘lishlari uchun manzilli ravishda tadbirlar tashkil etilayapti. Shu asnoda taʼlim muassasalari, hududiy boshqarmalardagi harbiy qismlarda yangi qurib foydalanishga topshirilayotgan maʼnaviyat va maʼrifat markazlari esa ayni maqsadlarga xizmat qilayapti desak mubolag‘a bo‘lmaydi.
Jamoat xavfiligi universiteti va Milliy gvardiya Toshkent shahri bo‘yicha boshqarmasi harbiy qismlaridan birida ochilish marosimi bo‘lib o‘tgan ana shunday maʼnaviyat va maʼrifat markazlari ushbu tadbirlarning navbatdagisi hisoblanadi. Mazkur markazlarning tantanali ochilish marosimida Milliy gvardiya qo‘mondonligi, Oliy Majlis Qonunchilik palatasi, Respublika Maʼnaviyat va maʼrifat markazi, O‘zbekiston Yozuvchilar uyushmasi aʼzolari, faxriylar, harbiy xizmatchilar, kursantlar va o‘quvchi yoshlar ishtirok etishdi. Unda so‘z olganlar ushbu markaz albatta yosh avlodning eng sevimli maskani bo‘lishiga ishonch bildirishdi.
Tadbir doirasida bir qator harbiy xizmatchilar xizmatda erishgan yutuqlari uchun rag‘batlantirildi. Shundan so‘ng mehmonlar binoda yaratilgan sharoitlar bilan tanishishdi. Ruhiy yengillashtirish, shaxmat-shashka, kitob mutolaa qilish, musiqa cholg‘ularida ijro etish xonalari, faollar zali kabilar ayniqsa tadbir ishtirokchilarida katta taʼsirot qoldirdi.
