Toshkent shahar Yashnobod tumanidagi 339-sonli umumtaʼlim maktabi binosida Milliy gvardiya Toshkent shahri bo‘yicha boshqarmasi bo‘linmalari harbiy xizmatchilari oila aʼzolari ishtirokida tadbir tashkil etildi. Tadbirda yoshlarni vatanparvarlik ruhida tarbiyalash, xizmat vazifalarini sifatli va samarali bajarishda oilaviy munosabatlarning o‘rni kabi dolzarb masalalar muhokama qilindi. Shuningdek, tadbir doirasida sayyor qabul ham bo‘lib o‘tdi.

Xususan, birinchi masala bo‘yicha O‘zbekiston Respublikasi Milliy gvardiyasi Markaziy apparati harbiy xizmatchilari va ularning oila aʼzolari bilan ishlash bo‘yicha masʼul podpolkovnik B. Ashirmatova "Vatanparvarlik oiladan boshlanadi" mavzusida maʼruza qildi. O‘z nutqida B. Ashirmatova tinglovchilarga “Vatanparvarlik”, u nimani anglatishi, nima uchun bolalarni Vatanga, uning tariga, o‘tmishiga va buyuk ajdodlariga hurmat ruhida tarbiyalash muhimligi to‘g‘risida so‘zladi. Ishtirokchilar, o‘z navbatida, vatanparvarlik ruhidagi tarbiya masalasi Vatan himoyachilari oilalari uchun qanchalik dolzarbligi to‘g‘risida fikr bildirishdi.

Shundan so‘ng Milliy gvardiya shaxsiy xavfsizlik boshqarmasining katta ofitseri podpolkovnik N. Urunbayeva internetdagi qimor o‘yinlari haqida gapirib, ularning xavfi nimada ekanligini tushuntirdi. Tinglovchilarning alohida eʼtibori oilasi va yaqinlarining xavfli o‘yinlar kushandasiga tushib qolishining oldini olish, shuningdek, inson virtual o‘yinlarga berilib ketganini qanday aniqlash va undan qutulishi uchun qanday chora ko‘rish kerakligiga qaratildi.

Milliy gvardiya psixologik qo‘llab-quvvatlash Markazining bosh mutaxassisi Sh.Qurbonova o‘z nutqida oiladagi munosabatlar mavzusini ko‘tarib, mojarolarning oldini olish, er-xotinning bir-birini tushunib, oilaviy hayotdagi inqirozlarni yengib o‘tishi hamda ota-onaning bolalarni tarbiyalashdagi ishtiroki qanchalik muhimligi haqida gapirdi.

Tadbir ishtirokchilarning ijtimoiy qo‘llab-quvvatlash masalalari bo‘yicha murojaatlarini tinglash bilan yakunlandi. Bir qator masalalar joyida hal qilinib, ayrim murojaatlar bo‘yicha mutasaddilarga ko‘rsatmalar berildi.